• 15 İyul, 2016, 17:30
• Oxunma (31 Baxış)
• Siyasət
• • Tweet

Sankt-Peterburq görüşündən sonra: Ermənilərin 300 atəşi, Azərbaycanın iki şəhidi

Sankt-Peterburqda iyunun 20-də Rusiya, Azərbaycan və Ermənistan prezidentləri Vladimir Putin, İlham Əliyev və Serj Sarqsyan arasında keçirilən üçtərəfli görüşdən sonra erməni silahlı bölmələri atəşkəs rejimini 300 dəfə pozub.

Publika.az “Report”a istinadən xəbər verir ki, atəşkəs ən çox Qazax, Tərtər, Ağdam, Füzuli və Xocavənd rayonları istiqamətində yerləşən qoşunların qarşıdurma xəttində pozulub.

Bu müddət ərzində Azərbaycan ordusunun iki hərbi qulluqçusu şəhid olub. İyulun 5-də Azərbaycan-Ermənistan dövlət sərhədində .Ermənistan tərəfinin snayper atəşi nəticəsində Azərbaycan ordusunun hərbi qulluqçusu əsgər Əliyev Vüsal Əmir oğlu şəhid olub.

İyulun 14-də axşam saatlarında cəbhə xəttinin Ağdam istiqamətində düşmən tərəfindən açılan snayper atəşi nəticəsində Silahlı Qüvvələrimizin hərbi qulluqçusu baş leytenant Məmmədov Toğrul Səyyad oğlu şəhid olub.

Müdafiə Nazirliyi bəyan edib ki, düşmən təxribatlarının nəticələrinə görə bütün məsuliyyət Ermənistanın kriminal hərbi-siyasi rejiminin üzərinə düşür.

Qeyd edək ki, iyunun 20-də Sankt-Peterburq şəhərində Rusiyanın dövlət başçısı Vladimir Putin, Azərbaycan Prezidenti İlham Əliyev və Ermənistan rəhbəri Serj Sarqsyan arasında üçtərəfli görüş keçirilib. Həmin görüşdə prezidentlər Dağlıq Qarabağ münaqişəsinin nizamlanmasına dair üçtərəfli görüşləri müntəzəm olaraq davam etdirmək barədə razılığa gəliblər.