Ermənistan iqtidarına yaxın siyasi güclər bu məsələyə sakit yanaşmağa üstünlük verirlər. Bunu onların mövzu ilə bağlı bildirdikləri münasibətdən aydın şəkildə görmək olar.

Əslində Ermənistan müxalifətinin də silah satışına yanaşma tərzi boş demaqogiyadan o yana keçmir.

Ermənistanda bu məsələyə ən ağrılı münasibət özlərini qərbyönümlü siyasi qüvvə hesab edən siyasi yazarlar və müxalifyönümlü siyasətçilərdir.

Qonşu ölkədə bununla bağlı tez-tez debatlar keçrilir və müxtəlif təhlil xarakterli yazılar dərc olunur.

Məsələ ilə əlaqədar Ermənistan parlamentini üzvü, Ermənistanın “Hnçakyan Sosial-Demokrat partiyası”nın sədri Lyudmila Sarkisyan və Ermənistan Ali Sovetiin keçmiş deputatı, Xristian-demokrat partiyasının sədri Azat Arşakyan debat xarakterli mətbuat konfransı keçiriblər.

Musavat.com erməni saytlarına istinadən həmin konfransda səsləndirilən fikirləri təqdim edir.

“Bizim Rusiyanın Azərbaycana silah satmasına mane olacaq halımız yoxdur. Bu böyük bir siyasi oyundur və burda iri biznes maraqları var. Ruisya dünya dövləti kimi regionda öz konkret maraqlarını güdür. Təbii ki, Rusiya maraqlarından çıxış edərək Azərbaycana silah satmaqda davam edəcək. Bu silahlardan bizə qarşı istifadə də ediləcək” – Lyudmila Sarkisyan bildirib.

Onun sözlərinə görə, əgər nəyəsə təsir edə bilmirsənsə bu barədə düşünməmək daha yaxşıdır.

Lyudmila Sariksyan Qarabağ məsələsinin tez bir zamanda həll oluna bilməyəcəyini də sözlərinə əlavə edib.

Onun opponenti Ermənistan Ali Sovetinin keçmiş deputatı, Xristian-demokrat partiyasının sədri Azat Arşakyan isə Rusiyanın Azərbaycana silah satmasının normal olmadığını söyləyib.

Arşakyan Ermənistanın öz imkanlarını dəyərləndirə bilmədiyini söyləyib: “Biz özümüz haqqında düşmənlərimizn fikirləşdiyi düşünürük. Bizə həmişə təlqin ediblər ki, özümüz heç nəyə qərar verə bilmərik”.

Arşakyanın sözlərinə görə, Emrənistanın maraqları Kollektiv Təhlükəsizlik Müqavilə Təşkilatı ilə üst-üstə düşmür.

“Rusiya Ermənistana dövlət kimi baxmır.O, Ermənistanı 1921-ci ilin vəziyyətinə, yəni suverenliyini itirmiş halına qaytarmaq qistəyir. Bizə ucuz qaz almaq qadağan olunub. Rusiya imperiyası heç kimin dostu deyil. Rusiyanın müttəfiqi də yoxdur. Rusiya düşmənimizə ona görə silah verir ki, o, 1921-ci ildə Azərbaycan üçün müəyyən edilən sərhədləri qorumaq istəyir.Ruisya öz çörəyini erməni əsgərlərinin qanı ilə yoğurur” -Arşakyan bildirib.

Lyudmila Sarkisyan isə debat zamanı oponentini Rusiyaya qarşı qərəzli nifrət bəsləməkdə ittiham edib.

“Kim deyir ki, nifrət edirəm. Mənə atəş açıblar. Məndə hələ də rus silahının qəlpələri qalıb”  -Azat Arşakyan onun bu sözlərinə cavab verib.

“Eybi yoxdur, saxlayın qalsın, lazımınız olar”, -deyə deputat Lyudmila Sarkisyan rəqibinə sarkazmla qarşılıq verərək söz atışmasını bitirib.(musavat.com)