“Zəbt edilmiş torpaqların bir hissəsi məmurlara məxsusdur” – Prezident
“Bəzi hallarda torpaqlar zəbt edilib. Minlərlə torpaq sahələri hasarlanıb. Orada heç bir fəaliyyət göstərilmir. Mən göstəriş vermişəm, arayış da hazırlayıb veriblər və orada dövlət məmurlarının adları da var. Zəbt edilmiş o torpaqların bir hissəsi onlara məxsusdur. Bu, yolverilməzdir”. Bunu prezident İlham Əliyev Nazirlər Kabinetinin 2016-cı ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunan iclasında bildirib.
Dövlət başçısı bildirib ki, torpaqlardan səmərəli şəkildə istifadə edilməlidir: “Əgər səmərəli şəkildə istifadə edilmirsə, həmin torpaqlar sahibkarlardan və yaxud da ki digər şəxslərdən alınmalıdır və o insanlara verilməlidir ki, onlar əkib-becərsinlər. Ona görə, prezident Administrasiyasına göstəriş verildi ki, əkilməyən kənd təsərrüfatı təyinatlı torpaq olmamalıdır. Yerli icra orqanları da bu məsələ ilə məşğuldurlar. İmkanı olan insanlar kənd təsərrüfatına investisiya qoysunlar ki, ölkəyə də xeyir olsun, özləri də xeyir götürsünlər”.
Prezident qeyd edib ki, korrupsiyaya, rüşvətxorluğa qarşı mübarizə öz nəticəsini verir: “Mən bir rəqəmi də ictimaiyyətin diqqətinə çatdırmaq istəyirəm. Bildiyiniz kimi, yoxlamalarla bağlı mənim çox ciddi tapşırıqlarım olmuşdu. Bu yoxlamalar insanları demək olar ki, bezdirmişdi, imkan vermirdi ki, sahibkarlar rahat nəfəs alsınlar. Çox ciddi göstərişlər, tapşırıqlar verilmişdir. Bu ilin altı ayında vergi yoxlamaları istisna olmaqla cəmi 56 yoxlama keçirilmişdir. Müqayisə üçün deyim ki, keçən il 40 min yoxlama keçirilmişdir. Baxın, 40 min və 56. Burada da heç bir şərhə ehtiyac yoxdur. Bax, belə olmalıdır. Amma bu 40 min yoxlamanın arxasında nələr dayanır?! Bunu bu yoxlamalara məruz qalmış insanlar yaxşı bilirlər. Biz onların canını bu işlərdən qurtardıq”.
Azərbaycan prezidenti qeyd edib ki, hər bir sahədə şəffaflıq, dürüstlük norma olmalıdır. Dövlət başçısı vurğulayıb ki, bu il bir ciddi sosial təşəbbüs də irəli sürülüb: “Aztəminatlı ailələr üçün ucuz mənzillərin inşası prosesi artıq başlayıb. Mənzil İnşaatı Dövlət Agentliyi yaradılıb. İndi təşkilati məsələlər öz həllini tapmaqdadır. Torpaq sahələri ayrılır və tezliklə MİDA öz işinə başlamalıdır. Mənzillər tikilməlidir. Bu mənzillər uzun müddətli güzəştli, şərtlərlə aztəminatlı ailələrə veriləcək. Bu, çox ciddi sosial təşəbbüsdür. Bu, geniş vüsət almalıdır. Hər bir bölgədə, hər bir rayonda buna ehtiyac var.
Bu təşəbbüs eyni zamanda inşaat sektoruna da ciddi təsir göstərəcək. Çünki inşaat sektorunda çox böyük geriləmə var və iş yerlərinin itirilməsi də məhz inşaat sektorunda baş verib. Ona görə geniş tikinti layihələri gözlənilir. Bunun çox müsbət təsiri olacaq. Məşğulluq artacaq və inşaat materialları sektoru da canlanacaq. Ona görə də sahibkarlar buna hazır olmalıdır. Bu, uzunmüddətli bir layihədir.
Mənzil İnşaatı Dövlət Agentliyinin fəaliyyəti bu il başlayır və davam edəcək. Ona görə də bütün inşaat materialları Azərbaycanda istehsal olunmalıdır. Onların böyük hissəsi istehsal olunur, ancaq indi həcm, tələbat artacaq. Özəl sektor da hazır olsun. Özəl sektor hazır olsun ki, təmin edə bilsin”.
yk news tv
