Rusiyanın xarici işlər naziri Sergey Lavrov və Fransanın xarici işlər naziri Mark Eyro Dağlıq Qarabağ münaqişəsini müzakirə edəcək.

ANS PRESS-in məlumatına görə, bu sözləri Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı deyib.

O bildirib ki, Serqey Lavrov və Mark Eyro arasında görüş 29 iyunda Parisdə baş tutacaq. “Görüş zamanı Ukrayna böhranı Yaxın Şərq, Dağlıq Qarabağdakı vəziyyət müzakirə ediləcək”.

Bundan əvvəl hər iki XİN rəhbərinin iştirakı ilə may ayının 16-da Azərbaycan və Ermənistan prezidentləri Vyanada görüşüblər. Prezidentlərin görüşündə həmçinin ATƏT-in Minsk qrupunun həmsədr ölkələri, ABŞ-ın dövlət katibi Con Kerri, iştirak edib.

Görüş iki saatdan artıq davam edib.

İ.Əliyev və S.Sarkisyanın 3+2 formatında (prezidentlər və həmsədrlər) görüşündə danışıqların iştirakçıları regionda 1994-95-ci il sazişi formatında atəşkəsə əməl olunacağına dair razılığa gəliblər.

Əliyevlə Sarkisyanın son görüşü isə Rusiyanın təşəbbüsü ilə iyunun 20-də Sankt-Peterburqda baş tutub.