Deputat: “İşğalçı Ermənistana konkret vaxt qoymalıyıq”
“Bu ilin aprel ayının əvvəllərində cəbhə xəttində baş verən döyüşlərdən sonra birmənalı olaraq diplomatik, siyasi və hərbi üstünlük Azərbaycanın yanındadır”.
Bunu Publika.az-a açıqlamasında Ana Vətən Partiyasının (AVP) sədri, millət vəkili Fəzail Ağamalı Rusiya, Azərbaycan və Ermənistan prezidentlərinin iyunun 20-də Sankt-Peterburqda keçirilən görüşünə münasibət bildirərkən deyib.
Deputat bildirib ki, aprelin əvvəllərində Azərbaycanın Ali Baş Komandanı, Prezident İlham Əliyevin əmri ilə işğalçıların təxribatlarına layiqli cavab verən Milli Ordu hər kəsə öz gücün nümayiş etdirib: “Ordumuz dünyaya başa saldı ki, işğalçı Ermənistanla müqayisədə Azərbaycanın imkanları daha genişdir, ordumuz güclüdür, Ali Baş Komandanın iradəsi qırılmazdır və işğal altında olan torpaqlar mütləq qaytarılmalıdır. Aprel döyüşlərinin verdiyi ən böyük nəticə budur”.
F.Ağamalı qeyd edib ki, aprel döyüşlərindən əvvəlki status-kvo indi mövcud deyil: “Bütün sahələrdə üstünlük Azərbaycan tərəfindədir. Çox təəssüf ki, işğalçı Ermənistan hələ də aprel məğlubiyyətindən ciddi nəticə çıxarmayıb. Yenə də ən müxtəlif hiylə və manevrlərlə status-kvonu qoruyub saxlamağa çalışır və işğal etdiyi torpalqardan tezliklə çıxmaq niyyətini ortaya qoymur”.
Deputat vurğulayıb ki, aprel döyüşlərindən sonra Azərbaycan və Ermənistan prezidentləri arasında keçirilən Vyana və Sankt-Peterburq görüşlərinin nəticələri ilə bağlı tərəflərin xarici işlər nazirləri tərəfindən verilən bəyanatlarda uzlaşdırılmış məqamlar diqqəti cəlb edir:
“Yəni, hər bir tərəfin nazirinin verdiyi bəyanat digərini təkzib etmir. Prezidentlərin Sankt-Peterburq görüşünün nəticələrin ilə bağlı da tərəflər müsbət fikirlər səsləndirib. Bildirilib ki, prezidentlərin görüşü konstruktiv keçib və növbəti daha ciddi nəticə verəcək görüşlər üçün əlverişli mühit yaranıb. Artıq bundan sonra konkret addımların atılması gözlənilir. Hələlik konkret addımların atılması barədə yalnız “gözlənilir” deyilir. Bunun da başlıca səbəbi bir tərəfdən Ermənistandır, digər tərəfdən isə bu münaqişənin həll olunmasında öz maraqlarını güdən ATƏT-in Minsk qrupunun həmsədr ölkələri olan “güc dövlətlər”dir. Mən yenə də Sankt-Peterburq görüşündən əvvəl söylədiyim fikirləri təkrarlayıram. Biz xalq olaraq işğalçı Ermənistanın hiylələrinə aldanmalı deyilik. Mən tam əminəm ki, Prezident İlham Əliyev Serj Sarkisyanın bütün hiylələrindən tam şəkildə xəbərdardır. Ona görə də Sarkisyanın atacağı hər hansı addım ölkə Prezidenti tərəfindən əvvəlcədən proqnozlaşdırılır. Tam əminəm ki, işğalçı Ermənistanın hər hansı hiylələri Azərbaycana ziyan gətirə biləcək kompromislərə getməyə gətirib çıxarmayacaq. Ancaq mən onun tərəfdarıyam ki, işğalçı Ermənistana konkret vaxt qoymalıyıq və ultimatum verməliyik. Bu vaxt ərzində Ermənistan Azərbaycan torpaqlarından işğalçı qoşunlarını çıxarmazsa, Milli ordumuz son sözü deməlidir. Milli Ordu hərəkətə keçəndən sonra isə Ermənistana verilən və işğal altında olan bütün torpaqlarımız azad olunmalıdır. Mən Azərbaycan Milli ordusunun gücünə və potensialına inanıram. Əminəm ki, bütün Azərbaycan əhalisi ordumuzun bu gücünə arxayındır. Ona görə də Azərbaycan ordusu və cəmiyyəti daha da gücləndirilməli, hər birimiz Ali Baş Komandanın ətrafında sıx birləşməliyik və zaman-zaman itirdiyimiz bütün tarixi torpalqarımızı azad etməliyik. Bu mənim şəxsi və qəti fikrimdir. Düşünürəm ki, mənim bu fikirlərim tarixi həqiqətlərə söykənir və reallığı özündə əks etdirir”.
yk news tv
