Səfir Vaşinqtonun Qarabağ məqsədini açıqladı
Amerika Birləşmiş Ştatlarının Azərbaycandakı səfiri Robert Sekuta bu ay keçirilməsi gözlənilir Azərbaycan və Ermənistan prezidentlərinin görüşü ilə bağlı açıqlama verib.ANS PRESS-in məlumatına görə, amerikalı səfir jurnalistlərə müsahibəsində nəzərdə tutulan görüşü şərh edərkən bildirib ki, Vaşinqtonun məqsədi hərtərəfli sülhə nail olmaqdır.
Onun sözlərinə görə, Vaşinqton çalışır ki, Azərbaycan və Ermənistan prezidentlərinin Vyana görüşünün nəticələrini daha da inkişaf etdirsin.
Azərbaycan xarici işlər naziri Elmar Məmmədyarovun ATƏT-in Minsk qrupunun amerikalı həmsədri Ceyms Uorlik ilə görüşdüyünü vurğulayan Robert Sekuta deyib ki, iyunun 2-də Ermənistan xarici işlər naziri Edvard Nalbandyan həmsədrlərlə görüş keçirəcək.
Azərbaycan və Ermənistan prezidentləri İlham Əliyev və Serj Sarkisyanın görüşü may ayının 16-da Avstriyanın paytaxtı Vyanada olub.
Görüş ATƏT-in Minsk qrupu həmsədrlərinin təşəbbüsü ilə baş tutub. ABŞ dövlət katibi Con Kerri, Rusiya və Fransa xarici işlər nazirləri Sergey Lavrov və Jan-Mark Eyro görüşdə iştirak edib.
Toplantının sonunda ATƏT-in Minsk qrupu bəyanatla çıxış edib. Sənəddə deyilir ki, prezidentlər atəşkəsə və münaqişənin sülh yolu ilə nizamlanmasına sadiq olduqlarını təsdiqləyiblər.
Tərəflər təmas xəttində gərginliyi azaltmaq üçün qısa müddət ərzində ATƏT-in araşdırıcı mexanizmləri üzərində işi başa çatdırmaq barədə, ATƏT-in fəaliyyətdə olan sədrinin şəxsi nümayəndəsinin mövcud rəhbərliyinin səlahiyyətlərini genişləndirməsi barədə razılığa gəliblər.
Tərəflər, həmçinin Beynəlxalq Qırmızı Xaç Komitəsinin vasitəçiliyi ilə itkin düşmüş şəxslər barəsində məlumatların mübadiləsini davam etdirmək barədərazılığa gəliblər.
İlham Əliyev və Serj Sarkisyan münaqişənin hərtərəfli nizamlanmasına dair dialoqun bərpası üçün danışıqların növbəti raundu barədə razılığa gəliblər. İyun ayında Azərbaycan və Ermənistan prezidentləri növbəti danışıqların yerini və vaxtını təyin edəcəklər.
yk news tv
