Ermənistanın baş naziri istefa verə bilər. ANS PRESS-in məlumatına görə, bu barədə baş nazir Ovik Abramyan özü ölkədə keçirilən Respublika Gününün 98 illik yubileyində iştirakı zamanı jurnalistlərə açıqlamasında bildirib.

Onun sözlərinə görə, müvafiq departamentlər xərclərin azaldılması ilə bağlı onun tapşırığını yerinə yetirməsələr, o zaman o, istefaya gedəcək.

“Biz müəyyən vaxt ərzində bir sıra iqtisadi layihələr həyata keçirdik. Əgər insanlar inanmırlarsa, onda işimizi onlar bizə inandıqları kimi etməliyik”, – deyə Ovik Abramyan bildirib.

Görünür, ölkənin acınacaqlı durumda olduğunu, pul çatışmazlığı olduğunu rəsmilər özləri də etiraf etməyə başlayırlar. Ötən gün Ermənistanın “Joxovurd” qəzeti də məlumat verib ki, Ermənistanın dövlət borcu sürətlə artır və yeni rekord imza atır.

Ermənistanın Maliyyə Nazirliyinin dərc etdiyi məlumata əsasən, 2016-ci ilin mayında ölkənin dövlət borcu 5 milyard 252 milyon 200 min ABŞ dollarına yüksəlib. Nəşr qeyd edir ki, aprel ayı ərzində bu göstərici 56 milyon 100 ABŞ dolları həcmində artıb.

“Maraqlıdır ki, son ay ərzində dövlət borcunun artımının əsas hissəsi xarici borcun payına düşür. Bu göstərici 53 milyon 400 ABŞ dolları artıb. Bu isə o anlama gəlir ki, Ermənistan iqtisadiyyatı beynəlxalq strukturların və maliyyə təşkilatlarının kreditləri hesabına mövcuddur”, – deyə qəzet yazır.