Axar.az xəbər verir ki, bu münasibətlə Türkiyə mətbuatında Atatürklə bağlı müxtəlif yazılarla yanaşı, onun ilk sevdiyi qadının – Eleni Karintenin yazdığı məktub da yayılıb. Məktubda deyilir:

“İllər keçdi, mən hələ də səndən xəbər gözləyirəm. Nə vaxt məktubumu alsan, məni xatırla. Vərəqdəki göz yaşlarımı görə biləcəksən. İllər və hadisələr ötüb-keçir, sənin haqqında çox şey danışırlar. Əgər başqa birini sevirsənsə, məktubumu cır at.

O qadını mənim səni sevdiyim qədər sevirsənsə, ona heç nə demə, sənin qədər xoşbəxt olmasını arzulayıram. Lakin başqasını sevmirsənsə, səni gözlədiyimi və ömür boyu gözləyəcəyimi bilməyini istəyirəm. Qayıdacağını, məni unutmayacağını bilirəm. Atam vəfat etdi. Məni səndən ayırdığı gündən tam bir il keçdi. O məni evə məhkum elədi və bir ay evdən çıxmağıma icazə vermədi.

Məni evləndirəcəkləri adamı gördüm və o mənə onu sevəcəyimi dedi. Mən isə ona “Yox, mən ancaq ilk sevgilimi sevirəm”, – dedim. Atam buna görə məni bağışlamadı, mən də onu bağışlaya bilmədim. Artıq əvvəlki kimi gənc və gözəl deyiləm…

Qeyd edək ki, yunan qızı Eleni ilə Mustafa Kamalın tanışlığı 1897-ci ilə təsadüf edir. 1896-cı ildə hərbi təhsil almaq üçün Makedoniyanın Bitola şəhərinə gələn Atatürk burada Eleni ilə tanış olur. Daha sonra onlar evlənmək üçün Bitoladan qaçırlar, lakin Eleninin atası onları tapır və qızını evə həbs edir. Bundan sonra onlar ayrılırlar. Məlumata görə, Eleni heç vaxt ailə qurmayıb və 80 yaşında Florinada vəfat edib.

Bu sevgi hekayəsi sənət dünyasında da özünə yer tutub. 2006-cı ildə Atatürk-Eleni sevgisindən bəhs edən sənədli film çəkilib. Aleksandr Popovskinin çəkdiyi “Balkanlar ölü deyil” filmində də Atatürk ilə Karinte arasındakı sevgidən bəhs olunur.(musavat)