Britaniya telekanalında Qarabağ atlarıdan reportaj yayımlanıb
11-15 may tarixlərində Kral Vindzor At Şousunda iştirak etmiş 15 Qarabağ atı haqqında reportaj Böyük Britaniyanın İTV kanalında yayımlanıb.
Reportaj ITV kanalının təxminən 700 min izləyicisi olan “Sabahın Xeyir Britaniya” adlı populyar əyləncəli -informasiya verilişinin hava xəbərlərinin aparacısı və at çaparı Laura Tobinin təqdimatında verilib. Xatırladaq ki, Qarabağ atlarının Kral Vindzor At Şousunda iştirakı Avropa Azərbaycan Cəmiyyəti (TEAS) və Azərbaycan Atçılıq Federasiyasının (ARAF) birgə təşkilatçılığı ilə baş tutub.
Avropa Azərbaycan Cəmiyyətinin direktoru Lionel Zetter İTV kanalına müsahibə verib. L.Zetter Azərbaycan və Qarabağ atlarının Vindzor Şousunda iştirakının təmin edilməsi barədə danışıb. O deyib: “Qarabağ atları öz sürəti, dözümlülüyü və çevikliyi ilə məşhurdu. Onlar sadəcə şou üçün olan heyvanlar deyil, həmçinin gündəlik istifadəyə də yararlıdır. Onlarla məşq etmək olur. Qarabağ atları polonun Azərbaycan versiyası olan çovqan oyununda iştirak etmək üçün də kifayət qədər cəld və sərtdir.”
Lionel Zetter daha sonra məlumat verib ki, TEAS yalnız atların deyil, həmçinin rəqqaslar qrupunun Bakıdan Vindzora gəlməsini təmin etmək üçün ARAF və Azərbaycan Mədəniyyət Nazirliyi ilə birgə çalışıb. TEAS, həmçinin, mədəniyyət pavilyonunu da təşkil edib. Burada Azərbaycan milli geyimləri sərgilənib və Azərbaycanın unikal topoqrafiyasını göstərən videolar da nümayiş etdirilib. Yüzlərlə qonaqlara Azərbaycanın təravətləndirici limonlu çayı və paxlavası canlı muğam musiqisi sədaları altında təqdim olunub.
yk news tv
