Şuranın dəstəyilə məktəblilər üçün Ekoloji Klublar yaradılır
“Davamlı İnkişafa Dəstək” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Məktəblilərin ekoloji klublarının yaradılması” layihəsinin icrasına başlayır.
Birliyin mətbuat xidmətindən yknews.az-a bildirilib ki, ətraf mühitin qorunmasında məktəblilərin rolunu gücləndirmək, onlar arasında ekoloji təfəkkürü artırmaq məqsədi daşıyan layihə Bakı və Gəncə şəhərlərində icra olunacaq.
İlkin mərhələdə 1 ay müddətində adları çəkilən şəhərlərdə məktəblilər arasında ekoloji maarifçilik işini yüksəltmək məqsədilə təlimlər keçiriləcək, məktəblilərin iştirakı ilə ekoloji divar qəzetləri hazırlanacaq.
Növbəti mərhələdə isə məktəblilərin iştirakı ilə ekoloji klublar yaradılacaq, onların fəaliyyət istiqamətləri və iş prinsipləri müəyyənləşdiriləcəkdir. Klublara üzv olacaq məktəblilər üçün təlimlər və digər praktik tədbirlər təşkil olunacaq.
Layihənin sonuncu mərhələsində isə məktəblilərin iştirakı ilə ekoloji aksiyalar (yaşıllaşdırma işləri, iməciliklər və s.) təşkil olunacaq, habelə onların ekoloji bilik və bacarıqlarının yoxlanılması üçün müxtəlif müsabiqələr keçiriləcək.
No Comments »
yk news tv
