Ermənistan yaralı və hərbiyə yararlı olmayan əsgərləri Dağlıq Qarabağa göndərir. ANS PRESS-in Ermənistanın “epress.am”saytına istinadla verdiyi məlumata görə, bu barədə Yezidilərin Milli Birliyi “Sincar” xəbər yayıb.

Məlumata görə, milliyətcə yezidi kürdü olan əsgər Tosuna Amoyan əməliyyat olunmadan, yaralı vəziyyətdə Dağlıq Qarabağa göndərilib.

Əsgərin atası Rzqana Amoyanın sözlərinə görə, onun oğlunun səhhətində problemlər olub. “O, ağırlıq qaldıra biləcək qədər sağalmayıb. Mənim oğlum heç cür xidmətə yaramır. Mən xahiş edirəm ki, onu əməliyyat etsinlər. Onun əməliyyata ehtiyacı var. Amma oğlumu hərbi hissəyə apardılar. Oğlumun səhhətini tibb məntəqədəsində yoxlamalıdırlar. Ona xəstəxanada dedilər ki, sənin heç nəyin yoxdur. 10 gün sonra Tosunanı yenidən Qarabağa apardılar”.

O, xəstəxanaya martın 15-də yerləşdirilib. Həmin vaxt əsgərin səhhəti ilə bağlı  Ermənistanın müdafiə nazirliyinə açıq məktub göndərilib. Məktub əsgərin valideynləri və “Sincar” təşkilatı tərəfindən göndərilib. Onun müraciətindən bir neçə gün sonra İrəvan Mərkəzi Kliniki Hərbi Hospitalına aparılıb. Əsgəri ongünlük müalicədən sonra xidmət etdiyi hərbi hissəyə aparıblar.

Həmin vaxt Tosuna Amoyanın səhhəti ilə bağlı məsələyə Ermənistanın Müdafiə Nazirliyinin mətbuat xidmətinin rəhbəri Artsrun Ovannisyan da reaksiya verib. O yazıb: “Hələ əsgərin hərbi hissəyə göndərilməsi ilə bağlı məsələni müzakirə etmək tezdir”.

Ümumilikdə, cəbhə xəttində aprel ayında vəziyyət gərginləşəndən sonra Ermənistan ordusundakı çatışmazlıqlar ortaya çıxıb. Məsələn, qarşı tərəfdə əsgərlərə laqeyd yanaşmaqla yanaşı, onların tibbi təchizatında da problemlərin olduğu bildirilib.

Aprelin əvvəlində cəbhə xəttində vəziyyət gərginləşən zaman Ermənistan ordusunda qana ehtiyacın yarandığı məlum oldu. Həmin vaxt Ermənistan həmişə olduğu kimi bu məsələdə də Rusiyadan kömək istədi. Rusiya Ermənistan ordusunun qana olan ehtiyacının ölkədəki hərbi heyətinin hesabına təmin ediləcəyini bildirdi. Hərbi qulluqçular 100 litr qan verəcək.

Rusiyanın Gümrüdəki hərbi bazasından isə hər bir hərbçi təxminən 200 millilitr qan verməli idi.