Kreml ideoloqu Lavrovun Qarabağ siyasətini faş etdi
Əgər Azərbaycan və Ermənistan Avrasiyaya daha çox inteqrasiya xəttini əsas tutarsa, o zaman biz (Rusiya nəzərdə tutulur – red.) münaqişənin həlli ilə bağlı fəal işə başlaya və problemin aradan qaldırılması üçün hüquqi yollar təklif edə bilərik. Ermənistan artıq Avrasiyaya doğru inteqrasiya edir, gərək Azərbaycan da bunu etsin. Yalnız o halda nəsə edə bilərik.
“Publika.az”a xəbər verir ki, bu sözləri Kremlin ideoloqu, Rusiyada avrasiyaçılıq ideyasının banisi Aleksandr Duqin Qarabağ münaqişəsi ilə bağlı danışarkən deyib.
Duqlin Qarabağda savaşın heç kimə, hətta Türkiyəyə də sərf etmədiyini, yalnız ABŞ-ın maraqlarına xidmət etdiyini açıqlayıb: “ABŞ Rusiyanı regionda daha çətin vəziyyətə salmaq niyyətindədirlər”.
Kremlin ideoloqu açıq şəkildə bildirib ki, Qarabağda müharibə başlayacaqsa, Rusiya Ermənistanı müdafiə etməyəcək. Ancaq Duqin Qarabağın Rusiyanın nəzarətinə keçə biləcəyinə də işarə vurub:
“Qarabağ Azərbaycanın ərazisidir. Bunu Rusiya daxil olmaqla bütün beynəlxalq ictimaiyyət qəbul edir. Lakin reallıq başqadır. Baxın, beynəlxalq ictimaiyyət Cənubi Osetiyanı və Abxaziyanı da Gürcüstanın tərkib hissəsi kimi tanıyır. Lakin regionda Rusiyasız hərəkət etmək belə nəticələr doğura bilər. Bura Cənubi Qafqazdır və 2008-ci ildə Gürcüstanda yaşananlar Qarabağ münaqişəsi tərəflərinin gözü önündə oldu. Əgər Qarabağda müharibə başlayacaqsa, biz müdaxilə etməyə məcbur ola bilərik”.
Duqin Rusiyanın Qarabağa sülhməramlı yerləşdirmək niyyətinin olmadığını iddia edib. Lakin onu da qeyd edib ki, əgər bu baş verərsə, yalnız qırğının qarşısının almağa yardım edə bilər:
“Təsəvvür edin, BMT sülhməramlıları bölgəyə gələrsə, azərbaycanlıları öz ərazilərinə qaytaracaq. Lakin bu yeni müharibənin əsasının qoyulması deməkdir. Yalnız Rusiya qoşunlarının bura yerləşdirilməsi müharibəyə son qoya bilər. Rusiya qoşunları Qarabağa yerləşərsə, əminəm ki, buradan hər kəsi çıxaracaqlar”.
Duqin münaqişənin həlli və işğaldakı rayonların azad edilməsi barədə “Lavrov planı”nı manipulyasiya adlandırıb:
“Lavrov planı”nda rayonların Azərbaycana qaytarılması məsələsi sadəcə diplomatik manevrdir. Geosiyasi nöqteyi-nəzərdən Rusiya yalnız Dağlıq Qarabağda status-kvonun saxlanılmasında maraqlıdır”.
Bütün bu ziddiyyətli açıqlamaların sonunda isə Duqin etiraf edib: Rusiya münaqişədə maraqlıdır.
yk news tv
