Rusiya Ermənistan və Azərbaycanla münasibətlərində bərabərlik işarəsi qoymur.

Virtualaz.org Novosti Armeniya-ya istinadən bildirir ki, bunu bu gün jurnalistlərlə söhbətində Rusiyanın Ermənistandakı fövqəladə və səlahiyyətli səfiri İvan Volınkin deyib.

Jurnalistlər ondan soruşublar ki, Rusiya nə üçün Azərbaycana silah satır, onunla Ermənistan arasında bərabərlik işarəsi qoyur və bu, Ermənistan-Rusiya münasibətlərinə necə təsir edə bilər?

“Burada söhbət qətiyyən bərabərlikdən getmir. Məsələ ondadır ki, Ermənistan Rusiya üçün strateji müttəfiqdir, Azərbaycan isə strateji tərəfdaş. Bunlar tamamilə ayrı-ayrı səviyyələrdir və heç bir bərabərlik işarəsindən söhbət gedə bilməz”, – deyə səfir vurğulayıb.

Son vaxtlar baş verən hadisələr fonunda Rusiya-Ermənistan münasibətlərinin pisləşməsi barədə yayılan fikirlərə gəlincə, səfir bildirib ki, indi yanaşmalarda emosiyalar üstünlük təşkil edir, amma Rusiya-Ermənistan münasibətlərinin çoxəsrlik tarixi var və onu silkələmək, zəiflətmək çox çətindir.

«Bəli, hansısa narazılıqlar, anlaşılmazlıqlar ola bilər, ancaq bu heç də o demək deyil ki, Rusiya-Ermənistan münasibətləri başqa fazaya keçə bilər. Bizim çox gözəl münasibətlərimiz var, dövlətlərimizin başçıları daim əlaqə saxlayırlar və düşünürəm ki, həmişə də belə olacaq”, – deyə İ.Volınkin bildirib.