Hansı səfirlik cəbhə hadisələrində aktiv oldu? – Jurnalistlərdən maraqlı CAVABLAR
Aprelin 2-nə keçən gecədən sonra Ermənistan- Azərbaycan qoşunlarının təmas xəttində, Dağlıq Qarabağ ətrafında 22 illik fasilədən sonra yenidən gərginlik yaşandı.
Ölüm-itinlə müşayiət olunan hərbi əməliyyatlar zamanı Azərbaycan Ordusu Ermənistan tərəfindən işğal olunmuş bir neçə mühüm strateji yüksəkliyi düşməndən təmizlədi.
Bu ərəfədə Azərbaycan təkcə cəbhədə döyüşmədi, həm də informasiya müharibəsi apardı. Aparılan informasiya müharibəsində media və diaspor təşkilatları ilə yanaşı, səfirliklər də iştirak etdi. Azərbaycanın xaricdəki diplomatik korpusları arasında aktivlik nümayiş etdirənlər də oldu, passiblik göstərənlər də…
Azərbaycan düşmənlə informasiya müharibəsi apardığı müddətdə xaricdəki hansı səfirliklərimiz özünü daha aktiv göstərə bildi?
Modern.az saytı bununla bağlı bir neçə jurnalistin fikirlərini öyrənib.
APA İnformasiya Agentliynin əməkdaşı Mübariz Aslanov deyir ki, Fransadakı səfirimizdən başqa, heç bir digər diplomatın aktivliyini müşahidə etməyib.
“Əsasən Fransadakı səfirliyin fəaliyyətini nisbətən aktiv gördüm. Qalanlarından demək olar ki, bir aktivlik müşahidə etmədim. Əsas yük xaricdə yaşayan azərbaycanlıların üzərinə düşdü.
Yəni həmvətənlərimiz kütləvi etiraz aksiyaları və başqa tədbirlər həyata keçirdilər. Avropa ölkələrindəki soydaşlarımızın aktivliyi fonunda səfirliklərdən cidi addımlar görmədim. Bəlkə də səssiz dəstəkləri oldu, amma hiss edilmədi”.
“Report” Agentliyinin şərhçisi Sədrəddin Soltan hesab edir ki, cəbhədə hadisələr başlayan ilk gündən səfirliklər sanki hazırlıqsız idi:
“Düzdür, hadisələr başlayan ilk gündə bütün səfirliklər sanki bu vəziyyətə hazırlıqsız kimi görünürdü. Ancaq sonradan ABŞ, Böyük Britaniya, İtaliya, Fransa və Latın Amerikası ölkələrində olan səfirliklərimiz fəallıq göstərə bildilər”.
“Yeni Müsavat” qəzetinin əməkdaşı Elşad Paşasoy cəbhədəki hadisələr zamanı Rusiya və Amerikadakı səfirlərimizin fəallığını müşahidə edib:
“Azərbaycanın Rusiyadakı səfiri Polad Bülbüloğlu və Amerikadakı səfiri Elin Süleymanovun müəyyən qədər fəallığı diqqətimi çəkdi. Təəssüf ki, ayrı-ayrı detalları çıxmaq şərtilə, diplomatik korpusun savaşını görə bilmədik”.
“Turan” İnformasiya Agentliyinin əməkdaşı Tofiq Türkel bildirib ki, nisbətən Amerikadakı səfir Elin Süleymanov fərqlənib:
“Xüsusi addımına görə hansısa bir səfirliyin adını çəkmək çətindir. Amma ayrı-ayrı səfirliklərdə tədbirlər həyata keçirildi. Hadisələrə qismən ictimai-siyasi təsir baxımından fərqlənən Amerikadakı səfir Elin Süleymanov oldu. O da ki, səfirin aktivliyi yox, ölkənin özünün vacibliyi baxımından çıxış etdi. Səfir xüsusi olaraq öz fəaliyyəti ilə fərqlənmədi, dövlətin maraqları baxımından çıxış etdi”.
yk news tv
