Kazan sənədinə Azərbaycanın cavabı
Son iki gündə müxtəlif mənbələr 2011-ci ildə gündəmə gələn Kazan sənədinin yenidən müzakirə olunduğunu bildirib. Hətta Ermənistan xarici işlər naziri də bu barədə dünən verdiyi müsahibədə danışıb.
Hafta.az xatırladır ki, 2011-ci il 25 iyunda keçirilən Azərbaycan və Ermənistan prezidentlərinin Kazan görüşü heç bir nəticə hasil olmadan başa çatmışdı. O vaxt görüşə vasitəçilik edən Rusiya prezidenti Dmitri Mevedev olmuşdu. Görünür, cəbhə xəttində yaranan gərginlikdən sonra məhz onun bölgəyə səfəri də təsadüfi deyildi.
Amma yada salaq ki, bu sənəd 2011-ci ildə Azərbaycan tərəfindən birmənalı rədd edilmişdi. Onu da yada salaq ki, Kazan görüşündən bir ay əvvəl, mayın 26-da isə Minsk Qrupunun həmsədri olan ölkələrin prezidentləri Dovil bəyanatını imzalamışdılar. Sözsüz ki, bu görüşdən əvvəl Rusiyanın təklifləri barədə tərəflər məlumatlandırılmışdı.
Azərbaycan Kazan görüşünə təkliflərə ediləcək əlavələrlə getdi. Və hətta bu görüşdən bir müddət keçəndən sonra elə həmin Nalbandyan ortada olan sənədə Azərbaycanın etiraz etdiyini bildirmişdi. Əlbəttə ki, Azərbaycan Prezidenti İlham Əliyev ölkənin milli maraqlarına cavab verməyən sənədə imza razılığı verə bilməzdi. Azərbaycan Prezidentinin sənədə təklif etdiyi əlavələr isə qarşı tərəf və vasitəçi olan Rusiyanı qane etmədiyindən danışıqlar nəticəsiz yekunlaşdı. Və görüşün səhəri gün Azərbaycan Silahlı Qüvvələrinin möhtəşəm paradı keçirildi. Bu parad isə qarşı tərəf və ona dəstək verənlər tərəfindən Azərbaycanın əzələ nümayişi kimi qəbul olundu. Əslində, 2011-ci ilin paradı və bu paradda prezident İlham Əliyevin çıxışı Kazan sənədinə rəsmi Bakının cavabı idi.
Kazan. 25.06.2011
yk news tv
