“Yayım” Assosiasiyasının təşkilatçılığı ilə Nəsimi rayonu 1 saylı orta məktəbdə Qarabağ müharibəsi veteranları ilə məktəblilərin görüşü baş tutub.

“Qarabağ müharibəsi – hadisələr şahidlərin gözü ilə” adlı tədbir gənclər tərəfindən çox maraqla qarşılanıb.

Tədbirin təşkilatçısı, “Yayım” Assosiasiyasının prezidenti Yaşar Zeynalov çıxış edərək Qarabağ müharibəsinin tarixindən, işğal altında olan Azərbaycanın digər yeddi rayonundan qaçqın düşən soydaşlarımızdan, şəhidlərimizdən və işğal altında qalan milli –mədəni abidələrimizdən bəhs edərək gəncləri unutqanlı olmamağa çağırıb: “2014-ci ildə təşkilatımız gənclər arasında “Qarabağ haqqında nə bilirsən” adlı sorğu keçirdi. Sorğuda iştirak edənlərin yarısı Qarabağ haqda müfəssəl biliyə malik olsa da, digər yarısı Qarabağı işğal altında olan Azərbaycanın bir rayonu kimi tanıdıqlarını bildirdilər. Bu zaman biz qərara gəldik ki, Qarabağ müharibəsi, işğal altında olan Azərbaycan əraziləri haqda gənclərimizi məlumatlandıraq. Hesab edirik ki. bu ərazilərin füsunkar gözəlliyi, yeraltı-yerüstü sərvətləri, bu torpaqlar uğrunda canından keçən şəhidlərimizi, qəhrəman müharibə veteranlarımızı bütün Azərbaycan gənci tanımalıdır”.

Y. Zeynalov həmçinin Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyilə həyata keçirilən layihədən də danışıb.

Tədbirdə çıxış edən Qarabağ müharibəsi veteranları  – Rüxsarə Cumayeva, Rauf Allahverdiyev, Yavər Nuriyev,  Bakı şəhəri üzrə Təhsil İdarəsinin əməkdaşı Reyhan Ağayeva, layihə koordinatoru Fazil Kərimli çıxış edərək gənclərə öz tövsiyələrini veriblər.

Qeyd edək ki, sözügedən tədbir ötən il Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə Yayım Assosiasiyası tərəfindən həyata keçirilən “Qarabağı unutma” adlı layihəsinin davamı olaraq həyata keçirilir.