Cəbhədəki qələbələr bizə nə verdi? – Psixoloq
Ordumuzun cəbhədə ard-arda qazandığı uğurlar əslində təsadüfi qazanılan uğurlar deyil. Qələbələr göstərdi ki, bu illər ərzində beyinlə hərəkət etmişik.
Bu sözləri psixoloq Esmira Teymurova son dövrlərdə ordumuzun cəbhədə qazandığı uğurların xalqımızın psixologiyasında hansı müsbət dəyişikliklərə səbəb olması haqda Axar.az-a danışarkən deyib. Psixoloq qələbənin ruh düşkünlüyünü aradan qaldırdığını bildirib:
“Qələbə bir ehtiyacdır – mənəvi ehtiyac. Havaya, suya ehtiyac duyduğumuz kimi. Keçid dövründə çoxlu sayda həm insan, həm də torpaq itkisi verdik. Təbii, istənilən itki insanda düşkünlük, frustrasiya, qorxular yaradır. Ümidin itirildiyi yerdə bayrağın strateji baxımdan vacib bir təpədən asılması insanın öz psixologiyası üzərində qələbəsi, qəlbinə çökmüş vahimənin məğlubiyyətidir. Xalqımız ruhi baxımdan, mənəviyyat, dəyər, etiqad baxımından düşüncələrini tənzimləməyə başlayacaq. Dövlət, millət, bayraq, torpaq sevgisini vacib məqam kimi sayacaq. Artıq insanların mənəvi-etik və iradi möhkəmliyə malik olmasının, həyatdan və tutduğu hər bir işdən həzz aldıqlarının şahidiyik.
Bir vaxtlar “müharibə olmasın”, “nəyə lazımdır o torpaqlar”, “təki insanlar ölməsin”, “biz orda gedib yaşamayacağıq” kimi uğursuz təbirlər var idi. Artıq barışmışdıq məğlubiyyətlə, təsəvvür edin ki, yeni nəsil, az qala, o torpaqların bizə aid olmasını bir əfsanə kimi zənn etməyə başlayırdı. Orduya xüsusi qayğı, həmçinin təhsil ocaqlarında vətənə sevgi təbliğ edilməyə başladığı dövrdən Azərbaycanın iqtisadi, mədəni-sosial baxımdan qazancları böyüyündən tutmuş, kiçiyinədək hər kəsdə özünəinam yaratdı. Son dövrün gəncləri daha sağlam düşüncə ilə cəbhəyə yollanırlar. Onlar hirsli olmaq yerinə əzmkarlığı, tələskənlik yerinə səbrli olmağı, əmr almağı, məsuliyyəti dərk edirdilər. Artıq cəbhədə qazanılan uğurları istər təhsil, istər digər sahələrdə ruh yüksəkliyi ilə təbliğ etməyə başlayıb. Kiçik qələbə özü heç də asanlıqla başa gəlmir. Bu ekstremal vəziyyət iradi hisslər sferasında iradi fəallıq halı yaratmaqla yanaşı, xalqı dəyərli keyfiyyətlər sferasında tərbiyə etmək uğrunda mübarizəyə daxilən hazırlamış olur. Qalibiyyətdən təzahür edən iradi inkişaf ekstremal şəraitdə özünü ələ ala bilmək(dözümlülük, soyuqqanlılıq, qorxmazlıq ) bacarığında özünü göstərir. İnsan bu nailiyyətləri sayəsində özünü ələ almağı, qorxu kimi maneələri aradan qaldırır, düşünərək qəbul etdiyi qərarları həyata keçirmək uğrunda qətiyyət göstərir. Bu gün şəhidləri itki kimi deyil, ölməz bir insan kimi torpağa tapşırırıq. Onları tanıyan-tanımayan hər kəs son mənzilə böyük ehtiramla yola salır. Media işçilərində də bir həvəs, qələbə xəbərini yaymaq, orada gedən döyüşlərin birbaşa izləyicisi olmaq arzusu yaranıb. İstənilən saytda könüllü orduya qoşulmaq istəyənlərlə bağlı xəbərlər var. Bu da kiçik uğurumuzun başlanğıcı kimi böyük nailiyyətdir. Dünya artıq torpağımız uğrunda mübarizəyə qoşulmağımızı dəstəkləyir. Ümumiyyətlə, son söz olaraq demək olar ki, ruhda açılan yaraları müalicə edəcək vasitələr sevgi, birlik və haqlı olaraq qazandığımız qələbələrdir”.
yk news tv
