“Bu qələbələrimiz davam edəcək”
Bu gün Milli Məclisin Gənclər və İdman Komitəsinin və Xətai rayon icra hakimiyyətinin təşkilatçılığı ilə “Ordumuza dəskək” adlı tədbir keçirilib.
Gənclər və İdman Komitəsinin üzvlərinin, gənclər təşkilatlarının nümayəndələrinin, tələbə gənclərin iştirakı ilə baş tutan tədbirdə əvvəlcədən dövlət himnimiz səsləndirilib, şəhidlərimizin ruhu ehtiramla anılıb.
Milli Məclisin Gənclər və İdman Komitəsinin sədri Fuad Muradov çıxış edərək bildirib ki, işğal olunmuş torpaqlarımızın azad edilməsi, ərazi bütövlüyümüzün bərpası ən vacib məsələmizdir.
“Bu həm hərbi, həm də siyasi yolla həll edilməlidir.
Ali Baş Komandan cənab İlham Əliyevin rəhbərliyi ilə ordumuz düşmənə sarsıdıcı zərbələr endirib və işğal altında olan torpaqlarımız bir qismi azad edilib. Bu münasibətlə xalqımız təbrik etmək istəyirəm. Düzdür şəhidlərimiz və yaralılarımız da oldu. Lakin bu zəfər xalqımızın tarixinə qızıl hərflərlə yazılacaq, bu qələbələrimiz davam edəcək”.
Gənclər və İdman Komitəsinin sədr müavini Ülvi Quliyev, Komitənin üzvü Adil Əliyev, millət vəkilləri Sevinc Hüseynova, Mahir Abbaszadə çıxış edərək bildiriblər ki, bu gün xalqımız üçün vacib məsələ olan hər bir qarış torpağımızın azad edilməsidir. Gənclərimizin xüsusi olaraq həmrəylik nümayiş etdirməsi təqdirəlayiqdir.
Qeyd edildi ki, Ermənistan münaqişənin uzanmasına çalışırdı və bu vasitə ilə bir mif formalaşdırmaq istəyirdi ki, Azərbaycan öz torpaqlarını azad edə bilmir. Lakin ölkə rəhbərliyinin qətiyyətli mövqeyi və xalqımızın əzmi sübut etdi ki, milli birliyimiz və Azərbaycan ordusu istənilən qüvvənin qarşısında dayanmağa hazırdır.
Gənclər təşkilatları adından danışan “İrəli” ictimai birliyinin sədri Mirhəsən Seyidov qeyd edib ki, gənclər qələbə ruhunda yaşayır. Cənab Prezidentin uzaqgörən siyasəti ətrafında sıx birləşib və onun bir əmrini gözləyir. Səkkizqat dünya çempionu Füzuli Musayev, Olimpiya çempionu Hicran Hüseynov çıxış edərək qeyd ediblər ki, düşmən tapdağında olan torpaqlarımız tezliklə azad ediləcək və “Cıdır” düzündə idman yarışlarımızı keçiriləcəkdir.
Gənclər adından çıxış edən BDU-nun tələbəsi, Mirhadi Səmidzadə, 5 saylı Peşə litseyinin tələbəsi Fərid Abdullayev gənclərin vətənimizin azadlığı üçün hazır olduqlarını bəyan ediblər, ordumuza dəstək nümayiş etdiriblər. Sonda gənclərin adından bəyanat verilib, tədbir “Cəngi” sədaları ilə yekunlaşıb.
yk news tv
