Siyasi və hərbi dividend: “Üç günlük döyüş” bizə nə verəcək? – OPERATİV TƏHLİL
Cəbhədə atəşkəs razılaşması əldə olundu. Müdafiə Nazirliyinin məlumatına görə, aprelin 5-də saat 12.00-dan etibarən Azərbaycan Ermənistan qoşunlarının təmas xəttində tərəflərin razılığı ilə əməliyyatlar dayandırılıb. Məlumatda o da qeyd olunur ki, Silahlı Qüvvələrimizin bölmələri azad edilmiş torpaqlarda möhkəmləndirmə işlərini həyata keçirir.
Bu, Azərbaycanın qısa müddətli müharibədən qazanclı çıxdığı deməkdir. Üç gün davam edən döyüşlərdə ordumuz iki kənd, bir strateji yüksəkliyi azad edib. Bu, aprelin 2-də açıqlanan rəsmi məlumatdır. Qeyri-rəsmi məlumatlara görə, ordumuz işğal altındakı torpaqların az da olsa müəyyən hissəsini düşməndən təmizləyib. Bunu Ermənistan mediası da yazır.
“Azərbaycan 8 yüksəkliyi ələ keçirdi”, deyə “armenianreport” saytının bu gün yaydığı məlumatında deyilir. Güman ki, döyüşlərdə əldə etdiyimiz haqda məlumatlar önümüzdəki günlərdə açıqlanacaq.
Atəşkəs əldə olunsa da Azərbaycan qısamüddətli döyüşlərlə müəyyən dividentlər əldə etdi.
Danışıqlar prosesi
1. Atəşin dayandırılması ilə bağlı razılaşmanın şərtləri hələ məlum deyil. Lakin “Silahlı Qüvvələrimizin bölmələri azad edilmiş torpaqlarda möhkəmləndirmə işlərini həyata keçirir” açıqlaması Ermənistanın “aprelin 1-dəki mövqelərə qayıtmaq şərti ilə atəşkəsə hazırıq” istəyinin qəbul edilmədiyini göstərir. Hesab etmək olar ki, Azərbaycan qısa müddətli döyüşlərdə düşməndən təmizlədiyi əraziləri əlində saxlamaq şərti ilə atəşkəsə razı olub. Bu, ən azından 20 ildən sonra bizim ilk qazancımızdır.
2. Bundan sonra danışıqlar prosesində Azərbaycanın əli güclənəcək və münaqişəyə dair yeni təkliflər irəli sürüləcək. Bu təkliflərin Azərbaycanın ərazi bütövlüyünün bərpası istiqamətində olacağı şübhəsizdir. Çünki döyüşlərin getdiyi vaxt həm ABŞ başda olmaqla Qərb, həm də Rusiya tərəflərə atəşi kəsmək çağırışı etdilər. Görünür, nə sərhədlərinin dibində münaqişənin alovlanmasına razı olmayan Rusiya, nə də bölgədə siyasi-iqtisadi maraqları olan Qərb yeni müharibə istəmir.
Azərbaycan üç günlük döyüşlərlə müharibə qabiliyyətinin yüksək olduğunu sübut etdi. Və göstərdi ki, torpaqların azad olunması üçün artıq səbir etmək niyyətində deyil. Bu baxımdan, danışıqların növbəti raundunda beynəlxalq və regional güclər Ermənistandan işğal etdiyi əraziləri boşaltmağı tələb edə bilərlər. Bu proses ən azından ilkin mərhələdə 5 rayonun azad olunmasını Ermənistana diktə edir. Hansı ki, Kreml bu təklifi bir neçə dəfə gündəmə gətirib.
3. Qısa müddətli döyüşlər beynəlxalq ictimaiyyətə Qarabağ münaqişəsinin “donmadığını” göstərdi. Halbuki, Ukrayna və Suriya münaqişəsi Qarabağ məsələsini arxa plana keçirmişdi. Bu isə Ermənistana işğalçı siyasətini davam etdirmək üçün münbit şərait yaradırdı. Artıq bundan sonra vəziyyətin əvvəlki kimi olmayacağı dəqiqdir.
Düşmən üzərində üstünlüyümüz və gözləntilər
1. Ermənistan Azərbaycan Ordusunun gücünü gördü. Ordumuzun sarsıdıcı zərbələri düşməndə ruh düşkünlüyü yaratdı. Qarabağa məcburi gətirilən erməni əsgərləri arasında fərariliyin atmasının ilkin işartıları görünür. Ehtimal etmək olar ki, qarşıdakı dövrdə Qarabağda xidmət edən erməni əsgərlərinin Azərbaycan tərəfinə keçməsi hallarının tez-tez şahidi olacağıq.
2. Dağlıq Qarabağa yerləşdirilən ermənilər burada yaşamaqdan imtina edəcəklər.
3. Ermənistanın verdiyi itkilər Sarkisyan hakimiyyəti üçün bir çox siyasi nəticələrə səbəb olacaq. Öz hakimiyyətini uzatmaq üçün parlament idarə üsuluna keçid haqda planlar quran Sarkisyan rejiminin bu istəklərinin gerçəkləşəcəyi ehtimalı azaldı.
Digər tərəfdən, sadə erməni əhalisi Dağlıq Qarabağı işğalda saxlayan Sərkisyan rejiminin hakimiyyətdən getməsini tələb edə bilər. Bu da münaqişənin sülh yolu ilə beynəlxalq hüquq çərçivəsində həllini sürətləndirə bilər. (http://publika.az/p/131371).
“Üç günlük döyüş”də əldə etdiyimiz və edəcəyimiz qazanc yaxın günlərdə tam bəlli olacaq. Amma bunun iki onillikdən sonra Azərbaycanın düşmən üzərində ən böyük qələbəsi olduğu tamamilə aydındır.
yk news tv
