“Yaraşıqlı atam mənim, səninlə qürur duyuram”.

Aprelin 2-də ermənilər tərəfindən vurulan hərbi vertolyotdakı pilot, mayor Təbriz Musazadənin 10 yaşlı oğlu Tayfun sosial şəbəkədə paylaşılan şəklin altından belə yazmışdı…

Sosial şəbəkələrdə və mediada Təbrizin şəhid olduğu yazılıb. Hazırda onun yaşadığı evə onlarla insan axışır. Qapının girəcəyində Təbrizin maşını dayanıb. Ailəsi isə Təbrizin sağ qaldığına inanır. Təbrizin anası, həyat yoldaşı gözünü qapıya dikib, gözləyir. Hamı möcüzənin baş verəcəyinə inanır.

“Dua edin, Təbrizdən yaxşı xəbər alaq”, – qohumlardan biri gələnlərdən xahiş edir.

Təbriz Musazadənin Tayfun və Onur adlı iki oğlu var.

“Təbriz “mən heç kimin evinə qara xəbər apara bilmərəm”, deyirdi. Ona görə də, həmişə özünü qabağa verirdi. Təbrizdən yaxşı xəbər gəlsin, ay Allah”, – deyə fəryad edir həyat yoldaşı.

T.Mustafazadənin yaxınları sosial şəbəkədə paylaşım edənlərdən məlumat yazarkən ehtiyatlı olmalarını xahiş edirlər. “Uşaqların gözü yoldadır. Biz hələ də onun sağ olduğuna inanırıq. Hər kəs bir məlumat paylaşıb, onlara zərbə ardından zərbə vurmasın. Biz Təbrizin sağ olduğuna inanırıq. Təbriz şəhid olubsa, Vətən uğrunda borcunu yerinə yetirib. Amma ümidimizi öldürməyin”.

Təbrizin yaxın qohumu, tanınmış vəkil Şəhla Hümbətova da sosial şəbəkədə paylaşım edib: “Dunya bashimiza uçub, ay Təbriz! Nəslimizin gözü, fəxrimiz! Bu necə işgəncədir, gecədən səhərə kimi səni gözləmək! Hələ də gözlərimiz qapıdadır ki, indi bir hərbçi qapıdan girib deyə ki, sağdır. Anan hər səsə qapıya qaçır ki, balam sağ qalib, xeber gəldi”.

Ailə pərişan halda dua edir, azacıq da olsa bir ümidlə… Təbrizdən xəbər gözləyirlər.