Aprelin 2-nə keçən gecə və gün ərzində bütün cəbhə boyu baş verən proseslərə dünya ictimaiyyəti də biganə qalmayıb. ANS PRESS-in məlumatına görə, İranın Xarici İşlər Nazirliyi məsələ ilə bəyanat yayıb. Nazirliyin sözçüsü Hüseyn Cabiri Ənsarinin  yaydığı bəyanatda hər iki qonşu ölkə səbrli  və təmkinli olmağa dəvət edilib:

“Bu həssas anlarda düşünülməmiş atılan  hər bir addım vəziyyəti daha da çətinləşdirə bilər. Hesab edirik ki, onsuz da regionda müharibə alovunu alışdırmaq istəyənlər çoxdur. Biz Qarabağ barədə aldığımız xəbərlərdən son dərəcə narahatıq. Ümid edirik ki,  hər iki ölkə yaranmış münaqişəni  Birləşmiş Millətlər Təşkilatı (BMT) səviyyəsində və danışıqlar vasitəsilə həll edəcəklər. Bununla da orada sülh və sabitlik hakim olacaq”, – deyə bəyanatda bildirilir.

Cəbhədə baş verən son proseslərə öz “Twitter” hesabı vasitəsi ilə münasibət bildirən Avropa Şurası Parlament Assambleyasının (AŞPA) sədri Pedro Aqramunt isə “Dağlıq Qarabağda zorakılığın artmasından dərin narahatlıq keçirdiyini, buna görə də, tərəfləri atəşkəsə əməl etməyə və danışıqları bərpa etməyə çağırdığını qeyd edib”.

Birləşmiş Millətlər Təşkilatının (BMT) baş katibi Pan Gi Mun da hər iki ölkənin hakimiyyətini Dağlıq Qarabağ münaqişəsi zonasında gərginliyin dərhal azaldılması üzrə tədbirlər görməyə çağırıb.

Baş katibin bəyanatında bildirilir:

“Baş katib münaqişə tərəflərini hərbi əməliyyatlara dərhal son qoymağa, atəşkəs haqqında sazişə tam şəkildə əməl etməyə və gərginliyin azaldılması üçün addımlar atmağa çağırır. Pan Gi Mun mülki əhali arasında çoxsaylı itkilər barədə məlumatlardan narahatdır”.

Aprelin 2-nə keçən gecə və gün ərzində bütün cəbhə boyu möqelərimiz və yaşayış məntəqələrimiz düşmən tərəfindən intensiv atəşə məruz qalıb. Bunun nəticəsində mülki əhali arasında ölən və yaralananlar var.

Bu təxribatın qarşısının alınması, mülki əhalinin təhlükəsizliyinin təmin olunması məqsədilə Silahlı Qüvvələrimizin komandanlığı tərəfindən Ağdərə-Tərtər-Ağdam və Xocavənd-Füzuli istiqamətində cavab tədbirlərinin keçirilməsi barədə qərar qəbul edilib.

Cəbhə bölgəsində son vəziyyət

Qısa müddətdə həyata keçirilən sürətli əks-həmlə zamanı erməni birləşmələrinin uzun illərdən bəri mühəndis-istehkam baxımından möhkəmləndirdiyi birinci müdafiə xətti cəbhənin bəzi istiqamətlərində yarılıb, strateji əhəmiyyətə malik bir neçə yüksəklik və yaşayış məntəqələri düşməndən tam azad olunub.

Goranboy rayonu və Naftalan şəhərinə təhlükə yarada biləcək Talış kəndi ətrafındakı yüksəkliklər, eləcə də Seysulan məntəqəsi düşmən qüvvələrindən tam təmizlənib.

Yüksəklik və yaşayış məntəqələri ermənilərdən azad olundu

Horadiz şəhərinin düşmən təhlükəsindən qorunması məqsədilə Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli “Lələ təpə” adlandırılan yüksəklik də bölmələrimizin nəzarətinə keçib.

Hazırda həmin yüksəkliklər və yeni müdafiə xətti boyu müvafiq gücləndirmə tədbirləri həyata keçirilir, yeni səngərlər qazılır və mövqelərdə möhkəmləndirmə işləri aparılır.

Döyüşlərdə ermənilərə məxsus 6 ədəd tank, 15-dək artilleriya qurğusu və möhkəmləndirilmiş mühəndis qurğuları məhv edilib, o cümlədən yüzdən çox hərbi qulluqçusu ölüb və yaralanıb.