Alman politoloq: “Qarabağda “özünümüdafiə gücləri” deyilən qüvvə mifdir”
“Dağlıq Qarabağdakı əsgərlər Ermənistan ordusunun hərbi qulluqçusudur. Hətta gənc çağırışçılar da Ermənistandan gələnlərdir”.
Publika.az xəbər verir ki, bu barədə almaniyalı politoloq Hayko Lanqner cəbhə xəttində gərginliyi şərh edərkən deyib.
Onun sözlərinə görə, Qarabağda “özünümüdafiə gücləri” deyilən qüvvə sadəcə mifdir: “Bu, faktiki olaraq Ermənistan ordusunun bir hissəsidir”.
H. Lanqner Almaniya Federal Hökumətinin qondarma “DQR”də keçirilən “seçkiləri” tanımamasına münasibət bildirərkən qeyd edib ki, bu siyasət Berlin üçün prioritet istiqamətdir: “Çünki Dağlıq Qarabağın tanınması mümkün deyil. Faktiki olaraq, bu rejim müharibənin ortaya çıxardığı qondarma quruluşdur. Ermənilər Qarabağdakı azərbaycanlıların hamısını öz evlərindən qovdu. Burada öz müqəddəratını təyin etmə prinsipinə istinad edirlər. Halbuki, bu prinsip şəxsi dövlət qurmaq deyil. Bu, bütöv bir xalqın öz müqəddəratını təyin etmədir. Digər tərəfdən, başqa bir xalqın öz müqəddəratını təyin etmə hüququnu pozaraq, bunu etmək qəbul edilən deyil. Bu hüquq bütün xalqlara aiddir və başqasının hüququnu pozaraq öz hüququna iddia etmək beynəlxalq qanunvericiliyə ziddir. Buna görə də indiyə qədər heç bir dövlət “DQR”-i tanımayıb”.
Politoloq bildirib ki, qondarma rejim Qərbdə siyasi əlaqələr qurmağa cəhd edir: “Hansı ki, bu əlaqələr bir növ özləri kimilərlə qurulur. Misal üçün, qatı millətçilər, yaxud etnik separatçılarla”.
H. Lanqner onu da əlavə edib ki, Dağlıq Qarabağda gərginliyin aradan qaldırılması üçün beynəlxalq birlik birgə səy göstərməlidir.
“Fikrimcə, hazırda ATƏT-ə sədrlik edən Almaniya buna nail olarsa, böyük iş görmüş olar və münaqişənin həllinə daha münbit şərait yaranar”, – deyə o bildirib.
yk news tv
