Rusiya prezidentinin mətbuat xidmətinin başçısı Dmitri Peskov Rusiya və digər həmsədr ölkələrmin Dağlıq Qarabağ münaqişəsinin həlllində inkişafa nail ola bilmədiklərini etiraf edib.

ANS PRESS-in məlumatına görə, Rusiyanın “TVS” telekanalında çıxış edən  Dmitri Peskov deyib: “Dağlıq Qarabağ munaqişəsinin həlli məsələsində vəziyyətdə hələ ki, inkişaf yoxdur. Sözün həqiqi mənasında hələ ki, vəziyyətin daha yaxşı olmasını arzulayırıq.  Rusiya (Minsk) qrupu ilə birlikdə  səy göstərir ki, proses dayanmasın və yavaş da olsa, irəliləmə yaşansın. Hələ ki, tərifə layiq heç nə yoxdur. Amma yeganə çıxış yolu odur ki, “beşlik” həm İrəvan, həm də Bakı üçün əlverişli şərait yaratsın”.

Dmitri Peskov bununla belə, tərəfləri bərabər tutmaqla münaqişənin həllinə mane olan əsas üslubdan uzaq durmayıb: “Bu cür münaqişələrdə bir tərəfin mövqeyini şərhsiz müdafiə etmək, xüsusilə də hərbi qüvvə tətbiq edilməsinə hazır olmaq heç cür inkişaf yardım etmir”.

Beləliklə, Rusiya prezidentinin mətbuat xidmətinin başçısı da Minsk qrupunun həmsədr ölkələrinin münaqişənin həllinə mane olan, status-kvonun saxlanmasına dəstək verən mövqeyini təkrarlayıb. Bu isə təbii ki, Azərbaycan torpaqlarının işğalının davam etməsi və işğalçı Ermənistanın beynəlxalq hüquq əsasında cəzalandırılmasına maneçilik törədilməsi deməkdir.

Bu  məsələdə son bir neçə ayda Rusiyanın bəzi dairələrinin qeyri-səmimiliyi bir qədər də dərinləşib. Azərbaycanın keçmiş dövlət müşaviri, politoloq Qabil Hüseynli ANS PRESS-ə müsahibəsində Dmitri Peskovun altı ay qabaq verdiyi müsahibələrin xeyli fərqli olduğunu bildirib: “Onda Peskov Ermənistanın heç də xoşuna gəlməyən bəyanatlar verirdi – yeddi rayonun qaytarılmasından, Lavrovun Bakıya səfərindən danışırdı. Rusiyanın bu yüksək çinli məmuru niyə birdən-birə bu qədər geriyə dönüş eləyir?”.

Qabil Hüseynlinin fikrincə, Rusiya mövqeyini bu cür dəyişməklə Azərbaycana təzyiqləri artırmaq istəyir: «Bu üsulla Moskva Azərbaycanın  həm Türkiyə, həm Avropa Birliyi, həm də NATO ilə  münasibətlərinə təsir etmək istəyir. Azərbaycan Rusiyanın güclənən təsirini azaltmaq üçün adekvat addımlar atmalı, 10-15 il əvvəl olduğu kimi qərbyönümlü siyasətin ağırlığı çox olan dövrə qayıtmalıdır».

Təbii ki, Azərbaycanın siyasətinin mərkəzində Qarabağ münaqişəsinin həllində status-kvodan uzaqlaşmaq üçün atılan ardıcıl addımlar dayanmalıdır. Rəsmi Bakı Minsk qrupunun üzvü olan bütün dövlətlərin nizamlanma prosesinə qaytarılmasına çalışmalıdır. Bu, qrupda indi daha çox Ermənistanı qorumaqla məşğul olan həmsədr ölkələrin Azərbaycan əlayhinə siyasətini balanslaşdırmağa imkan yarada bilər. Nəticədə, Qarabağ münaqişəsinin nizamlanması prosesi həmsədrlərin kefi istəyin kimi yox, beynəlxalq hüququn tələbləri əsasında, yəni Azərbaycanın ərazi bütövlüyünün qorunması çərçivəsində irəliləyər.