Rusiya prezidenti Vladimir Putin və ABŞ-ın dövlət katibi Con Kerrinın Moskvaya gətirdiyi qırmızı çamadanla bağlı zarafatlaşıb. ANS PRESS-in məlumatına görə, bu barədə Putin Kerriyə atmaca atıb. Görüş zamanı Putin dövlət katibinə bildirib ki, təyyarədən enərkən çamadanını daşımaqda ona heç kimin kömək etməməsinə təəccüblənib və buna görə məyus olub.

“Sonra fikirləşdim ki, bəlkə, çamadanda elə qiymətli şey var ki, Siz onu heç kimə etibar etmirsiniz? Məsələn, həlli vacib məsələləri yoluna qoymaq üçün pul?!”, – deyə Putin bildirib.

Prezident sonra əlavə edib ki, “zarafat öz yerində”, amma Kerrini gördüyünə şaddır: ” Çünki onunla həmişə ortaq məxrəcə gəlmək olur”. Kerri isə öz növbəsində Putinlə təkbətək görüş zamanı portfelin içindəkini ona göstərəcəyini söyləyib: “Düşünürəm ki, bu Sizin üçün xoş bir sürpriz olacaq”.

Bu arada ABŞ dövlət katibi Con Kerrinin özü ilə birgə Rusiyaya gətirdiyi gitaranın sirri açılıb. Sirri  Rusiya Xarici İşlər Nazirliyinin  sözçüsü Mariya Zaxarova açıb.

“Con Kerrinin Moskvaya özü ilə gətirdiyi gitara Rusiya xarici işlər naziri Sergey Lavrovun ad gününə hədiyyə deyil, onun şəxsi musiqi alətidir”, – deyə Zaxarova məlumat verib.

Bir müddət əvvəl isə bəzi KİV-də məlumat yayılmışdı ki, Kerrinin özü ilə gətirdiyi gitara Sergey Lavrovun ad gününə hədiyyədir.

“Bununla da, ABŞ dövlət katibinin Moskaya enişindən sonra Amerika nümayəndə heyətinin əlində olan gitaranın sirrini açıram. Bizə suallar verməyə başladılar. Bu, Sergey Lavrovun ad gününə hədiyyədirmi? Xeyr. Bu, Con Kerrinin özü ilə bütün dünyanı gəzdirdiyi şəxsi gitarasıdır”, – Zaxarova öz “Facebook” səhifəsində yazıb.