Ləzgi xalqının azadlığı adı altında terrorçu fəaliyyətlə məşğul olmuş separatçı “Sadval” təşkilatının lideri qətlə yetirilib. ANS PRESS-in “RİA Novosti”yə istinadla verdiyi məlumata görə, Nazim Hacıyev Dağıstanda naməlum şəxslər tərəfindən öldürülüb.

“Hacıyevin meyiti mənzillərdən birində tapılıb. Onun üzərində çox sayda bıçaq yarası olub. Hazırda fakt ilə bağlı cinayət içi açılıb”, deyə hüquq mühafizə orqanlarındakı mənbə agentliyə bildirib.

Düz bir il öncə adıçəkilən təşkilatın başqa bir fəalı Ruslan Maqomedrəhimovun da meyiti tapılmışdı.

N.Hacıyev 1944-cü ildə Dokuzparinski rayonunun Kuruş kəndində anadan olub. Tələbə olan zamanlardan gənclər arasında ləzgilərin muxtar respublikasını yaratmaq üçün təbliğata başlayıb.

“Sadval” Azərbaycanda ekstremist və terror təşkilatı kimi tanınır. Terror təşkilatı 1994-cü ilin martın 19-da metronun “20 yanvar” stansiyasında teror aktı törətmişdi. Terror hadisəsi zamanı 14 nəfər ölmüş, 49 nəfər isə yaralanmışdı.

İstintaq nəticəsində, “Sadval” separatçı təşkilatının üzvləri həbs olunur, istintaq zamanı məlum olur ki, terrorçular Ermənistan respublikasının xüsusi xidmət orqanları ilə sıx əlaqədə olaraq, Ermənistanda olmuş və orada onlara xüsusi təlim keçiliblər.