Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası üzvlüyünə “Səhiyyə, sağlamlıq və ekologiya” qrupu üzrə seçki keçirilib.

qhtxeber.az-ın məlumatına görə, iclasa açıq səsvermə ilə Sevda Tahirli sədr, Samirə Mustafayeva isə katib seçilib. Sonra say komissiyasının 3 nəfərdən ibarət tərkibi müəyyən edilib. Sevda Tahirli iclasda qeydə alınmış 70 QHT nümayəndəsindən 69-unun iştirak etdiyini deyib və təşkilati-texniki işlər haqqında məlumat verib.

Şura üzvlüyünə namizədlər “Səma və Eko” Elmi-Praktik İctimai Birliyinin sədri İradə Həsənova, Hemofiliyalı xəstələrin Respublika assosiasiyasının prezidenti Gülnarə Hüseynova, “Sağlam İnkişaf və Maarifləndirmə” İctimai Birliyinin sədri Anar Xəlilov və Ekoloji maarifçilik və monitorinq İctimai Birliyinin prezidenti Qəmzə Yusubova iclasda çıxış ediblər.

Səsvermədən sonra nəticələr açıqlanıb. Ən çox səs toplayan ilk 3 nəfər Anar Xəlilov (46 səs), Gülnarə Hüseynova (29 səs) və Qəmzə Yusubova (13 səs) olub.