QHT Şurasında seçki keçirildi – NƏTİCƏLƏR
Bu gün Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının “İnsan hüquqları və demokratiya” üzrə ixtisaslaşmış qrupunun üzvlüyünə seçkilər keçirilib.
Modern.az-ın prosesi izləyən əməkdaşının verdiyi xəbərə görə, seçkiləri Niderlandın, Yunanıstanın, Avropa İttifaqının ölkəmizdəki səfirliklərinin nümayəndələri izləyib. Tədbirdə əvvəlcə iclasa sədr – Sahib Fərzəliyev və katib – Zemfira Mustafayeva seçilib. Sonra Şura üzvlüyünə namizədlər “Azərbaycan-Slavyan Gəncləri Assosiasiyası” İctimai Birliyinin sədri Səbuhi Abbasov, “Sülhə Çağırış” Tolerantlığa Dəstək İctimai Birliyinin sədri Aynurə Asimqızı, Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov, Ahıl Ziyalılara Qayğı İctimai Birliyinin sədri Nurullayev Nəsrulla, “Neftçilərə Hüquqi Yardım Mərkəzi” İctimai Birliyinin sədri Nəbi Rəhimov çıxış ediblər.
Ardınca say komissiyası seçilib. İclasa sədrlik edən Sahib Fərzəliyev bildirib ki, səsvermədə 65 nümayəndə iştirak edir:
Hər bir nümayəndə maksimum 3 namizədə səs verə bilər. Səsvermənin nəticələrinə uyğun olaraq ən çox səs toplayan üç nəfər Şura üzvlüyünə təsdiq olunmaq üçün ölkə başçısı İlham Əliyevə təqdim olunacaq. Prezidentin sərəncamı ilə bu üç nəfərdən biri Şura üzvü kimi təyin ediləcək”.
Səsvermənin nəticələrinə görə, ilk üç yeri Vətəndaşların Əmək Hüquqlarını Müdafiə Liqası İcraiyyə Komitəsinin sədri Sahib Məmmədov (60 səs), Ahıl Ziyalılara Qayğı İctimai Birliyinin sədri Nurullayev Nəsrulla (20 səs), “Neftçilərə Hüquqi Yardım Mərkəzi” İctimai Birliyinin sədri Nəbi Rəhimov (21 səs) tutub.
Qeyd edək ki, martın 17-ə qədər digər ixtisaslaşmış QHT qrupları üzrə də seçkilər keçiriləcək.
yk news tv
