Adətən Ermənistan barədə tənqidi hesabatlar dərc ediləndə bu ölkənin hakimiyyəti dərhal bunu qərəz və böhtan kimi qələmə verməyə çalışır.

Bu dəfə isə fərqli vəziyyət yaranıb. Özü də hesabatı təqdim edən hansısa bir müxalifət funksioneri deyil, yüksək vəzifəli dövlət məmurudur. Hesabatdan bəlli olur ki, yoxsulluq və miqrasiyanın sürətlə artdığı ölkədə sui-qəsd halları da kəskin şəkildə artmaqdadır. Onu da nəzərə almaq lazımdır ki, hesabatda real vəziyyəti əks etdirən faktlar xeyli azaldılıb.

Beləliklə, Ermənistan Fövqəladə Hallar Nazirliyinin Böhran İdarəetmə Milli Mərkəzinin statistik məlumatı ölkədə şok effekti doğurub. Erməni nəşrləri yazır ki, bu hesabatdan sonra prezident Serj Sarkisyan qurum rəhbərliyinə əməlli qulaqburması verib. Çünki hesabata əsasən, 2015-ci ildə ölkədə intiharların sayının artması müşahidə olunub. “2014-cü illə müqayisədə 2015-ci ildə qeydə alınan intihar hallarının sayı artıb” – deyə mərkəzin rəisi Hovannes Xangeldyan Yerevandakı tədbirlərdən birində bəyan edib. “2015-ci ildə 195 intihar halı və 557 özünəqəsd cəhdi qeydə alınıb. Əksər hallarda (133 nəfər) intihar edənlər özlərini asıb, 31 nəfər özünü yüksəklikdən yerə atmaqla həyatı ilə vidalaşıb” – deyə mərkəzin rəisi açıqlayıb. Ötən ildən Yerevanda fəaliyyətə başlamış İntihar hallarının araşdırılması və aradan qaldırılması üzrə Mərkəzin rəhbəri Lilit Baqdasaryanın sözlərinə görə, özünəqəsdin əsas səbəbləri psixoloji, sosial, sosial-iqtisadi problemlərlə bağlıdır.

Ekspert bu hallardan başqa, risk qrupuna ağır xroniki və müalicə olunmayan xəstəliklərdən əziyyət çəkən insanların da daxil olduğunu bildirir. Bu qəbildən olan insanlar “depressiya halına düşür və məhz bu zaman onların psixoloji yardıma ehtiyacı olur” – deyə o bildirib. Ermənistan Milli Statistika Xidmətinin məlumatına görə, yaş baxımından əsas intihar risk qrupunu 30-65 yaşlılar təşkil edir. O da qeyd edilir ki, Ermənistanda ən ağır yük altında qalan gənclərdir. Ermənistan hakimiyyətinin ağızdolusu dediyi “Erməni gəncləri ölkənin qarantıdır” sözlərini isə ekspertlər puç hesab edirlər. Erməni həkim və psixoloqları artıq vəziyyətin dözülməz şəkil aldığını bəyan edirlər. Onlar bildiriblər ki, sosial-iqtisadi problemlərin içində batan erməni gənclərinin bir qismi dəlilik həddinə çatıb və psixoloji problemlər içində boğulurlar. Bu səbəbdən də intihara əl atırlar. Onların sözlərinə görə, bununla yanaşı, erməni gəncləri arasında dəlilik əlamətlərinin artması halları 2015-ci ildə 20 faiz artıb. Ermənistan ordusundakı vəziyyət də dözülməz səviyyədədir. Erməni ordusunda intiharlar, əsgərlərin öz aralarındakı münaqişələr, ölüm halları mütəmadi xarakter alıb. Bunun nəticəsi olaraq ölkənin içində baş qaldırmış ciddi narazılıq isə hökumət üçün başağrısına çevrilib. Vəziyyətin belə ağırlaşdığını görən S. Sarkisyan hökuməti isə ictimaiyyəti sakitləşdirmək üçün yalan maşınını işə salıb. Hökumətə yaxın QHT və təşkilatların əliylə həyata keçirilən bu prosesin mərkəzində isə ordudakı ölüm hallarının gizlədilməsi və rəqəmlərin kiçildilməsi dayanır. Belə ki, həmin təşkilatların iddiasına görə, guya erməni ordusunda intihar hallarının sayı azalmağa başlayıb. Lakin erməni mətbuatı hökumətin yalanını üzə çıxaran faktları ortalığa qoyduqdan sonra rəsmi qurumlar susmağa məcbur olublar. Qəzetlərin yaydığı məlumatlarda isə vurğulanır ki, Ermənistan ordusunda intihar edən əsgərlərin sayı ötən il 100-ə çatıb. Onların bildirdiyinə görə, əsgərlərin intihara əl atmasının başlıca səbəbi zabitlərin onlarla vəhşi kimi davranması və ordudakı təminatın çox aşağı olmasıdır.(azadinform)

Ümumiyyətlə, son illər Ermənistanda intihar hadisələrinin artması bu ölkənin kütləvi informasiya vasitələrinin bəhs etdiyi əsas mövzulardan hesab edilir. Məsələn, Fransadakı erməni lobbisinin vəsaiti hesabına gündəlik nəşr olunan “Ermənistan xəbərləri” jurnalının nömrələrindən birində müstəqil erməni jurnalisti Marianna Qriqoryanın “Ermənistan: intihar faizi artır” sərlövhəli məqaləsi hələ də Ermənistanda müzakirə mövzusudur. Bu məqalə Ermənistanın xaricdəki imicinə ciddi zərbə vurub. Ermənistan Milli Statistika Xidmətinin məlumatına istinad edilən məqalədə bildirilib ki, iqtisadi tənəzzülün getdikcə dərinləşdiyi və acınacaqlı vəziyyətin yarandığı bu ölkədə özlərinə qəsd edənlərin əksəriyyəti intihar üçün paytaxt Yerevanın mərkəzində yerləşən 62 metr hündürlükdəki Kiyev körpüsünü seçir. Erməni ekspertləri son 10 ildə intihar hallarının sürətlə artmasını ölkə iqtisadiyyatının tənəzzülə uğraması, məmurların özbaşınalığı, dövlət rəsmilərinin korrupsiyaya qurşanmaları, ölkə əhalisinin əksəriyyətinin yoxsulluğun son həddində yaşaması ilə əlaqələndiriblər.