“Yayım” Assosiasiyası mart ayından başlayaraq Bakı şəhərinin orta ümumtəhsil məktəblərində gənclərdə vətənpərvərlik ruhunun yüksəldilməsi məqsədi ilə “Qarabağı unutma” adlı görüşlərə başlayır.

Assosiasiyanın rəhbəri Yaşar Zeynalovun qhtxeber.az-a bildirdiyinə görə, keçirəcəkləri tədbirlər 2015-ci ildə Azərbaycan Respublikasının Prezidenti yanında Qeyri – Hökumət Təşkilatlarına Dövlət Dəstəyi Şurasının maliyyələşdirdiyi eyniadlı layihənin davamı kimi təşkilatın öz imkanları çərçivəsində reallaşacaq: “İlk görüşümüz martın 3-də Nərimanov rayonundakı 45 saylı məktəbdə üç məktəbin 9-11-ci sinif  şagirdlərinin iştirakı ilə keçiriləcək. Sevinirik ki, təşəbbüsümüzü dəstəkləyən və bizimlə birgə görüşlərdə iştirak etmək istəyən veteranlar, şəhid ailələrinin üzvləri və QHT-lərin sayı kifayət qədər çoxdur”.

Y. Zeynalov əlavə edib ki, bu təşəbbüs artıq Bakı şəhəri üzrə Təhsil İdarəsi tərəfindən bəyənilib və idarənin tabeçiliyində olan bütün təhsil müəssisələrinə müvafiq göstəriş verilib.

Görüşlərdə məktəblərə Qarabağ haqqında, şəhidlərimiz haqqında və erməni vandalizmindən bəhs edən müxtəlif kitablar, QHT-lər tərəfindən hazırlanmış disklər hədiyyə ediləcək.