İlham Əliyevdən daha bir inqilabi fərman
Bu gün Azərbaycan prezidenti İlham Əliyev ixracın təşviq edilməsinə yönələn əlavə təbirlər haqda fərman imzalayıb. Fərmana əsasən Azərbaycan ərazisində istehsal olunan qeyri-neft məhsullarının ixracı ilə məşğul olan iş adamlarına dövlət büdcəsinin vəsaiti hesabına əlavə ixrac təşviqi vəsaiti ödəniləcək.
Fərmanda deyilir ki, ödəniləcək ixrac təşviqinin baza məbləği ixrac əməliyyatlarına görə faktiki ixrac olunmuş malın ixrac gömrük bəyannaməsində nəzərdə tutulan gömrük dəyərinin 3 (üç) faizini təşkil ediləcək.
Fərmanda Nazirlər Kabinetinə göstəriş verilir ki, qeyri-neft məhsullarının ixracı ilə məşğul olan iş adamlarının təşviq edilməsi qaydasını və ixrac təşviqinə şamil olunacaq məhsulların siyahısını bir ay müddətində prezidentlə razılaşdırmaqla müəyyən etsin. Habelə ixrac təşviqinin ödənilməsi üçün bu ilin dövlət büdcəsində, cümlədən sonrakı 4 il üçün dövlət büdcəsində ayrıca vəsaitin nəzərdə tutulması təmin edilsin. Fərman bu il martın 1-dən qüvvəyə minir və 2020-ci ilə qədər qüvvədə olacaq.
Xəbər verildiyi kimi Azərbaycanda istehsal olunan qeyri-neft məhsullarının ixracının təşviq edilməsi prezident İlham Əliyevin yanvarın ortalarında ölkədəki iqtisadi vəziyyətə həsr olunmuş müşavirədəki çıxışı zamanı elan olunan yeni iqtisadi siyasətin əsas prioritetlərindən birini təşkil edirdi. İxracın təşviq edilməsi praktikasından bir çox ölkələr, məsələn, Türkiyə uğurla istifadə edib. Türkiyədə bu praktikanın tətbiq olunması ixrac həcminin kəskin artmasına və beləliklə də ümumi iqtisadi inkişafa ciddi təkan vermişdi.
İndi Azərbaycan prezidentinin bu fərmanı ölkə iqtisadiyyatının inkişafının qeyri-neft relsləri üzərinə keçirilməsində mühüm əhəmiyyət kəsb edəcək və ölkədə rəqabətədavamlı qeyri-neft məhsullarının istehsalını genişləndirəcək. Məsələn, hansısa iş adamı Azərbaycandan 10 milyon dollarlıq mal ixrac etsə dövlət büdcəsindən 300 min dollar vəsait ala biləcək. Deməli iş adamları Azərbaycanda istehsal olunan qeyri-neft məhsullarını xarici bazarlara çıxarmaqda maraqlı olacaqlar.
Məsələ burasındadır ki, Azərbaycanda son texnologiyalarla təchiz edilmiş avadanlıqlara malik müəssisələr, o cümlədən emal müəssisələri qurulsa da onların istehsal etdiyi məhsulların xarici bazarlara çıxarılması işi indiyədək o qədər də uğurla təşkil edilməmişdi. İndi həyata keçirilən iqtisadi islahatlar, gömrük sistemində həyata keçirilən dəyişikliklər sayəsində Azərbaycandan məhsul ixrac etməyin qarşısında dayanan maneələr aradan qalxır, üstəlik dövlət ixracatçılara pul da ödəyir…
yk news tv
