“Minsk qrupu pat vəziyyətindədir və təcili ləğv edilməlidir”
Beynəlxalq birlik davam edən Dağlıq Qarabağ münaqişəsinə gözlərini yumub. Təəssüf ki, ATƏT-in Minsk qrupu həmsədrləri münaqişənin həlli istiqamətində heç bir irəliləyiş əldə etməyib.
Bunu Azadinform-a müsahibəsində amerikalı siyasi ekspert Piter Teys deyib. O qeyd edib ki, həqiqətən də danışıq aparan ekspertlər BMT Təhlükəsizlik Şurası tərəfindən 20 ildən çoxdur ki, müəyyən edilən vəzifə və mandatı yerinə yetirməyə müvəffəq olmayıb: “ABŞ, Fransa və Rusiya Federasiyasını təmsil edən diplomatlar qrupu “pat vəziyyətindədir” və təcili ləğv edilməlidir”.
Teys vurğulayıb ki, ATƏT-in Minsk qrupu Dağlıq Qarabağ münaqişəsinin həlli istiqamətində bir çox məsələlərdə öz mülahizələrində ikili standart tətbiq ediblər: “Qeyd etmək lazımdır ki, Avropa İttifaqı (Aİ) və ABŞ Şərqi Ukraynadakı münaqişə və Krımın ilhaqına cavab olaraq Rusiyaya qarşı iqtisadi sanksiyalar da daxil olmaqla cəld tədbirlər görüb. Lakin beynəlxalq birlik Azərbaycan torpaqlarının 20%-ni işğal edən Ermənistana qarşı bu cür ölçülər götürməyib”.
Fevralın 12-14-də Münhen Təhlükəsizlik Konfransının keçirildiyini deyən Teys bildirib ki, konfrans bir çox münaqişələrə və dünyanın bəzi regionlarında təhlükəsizliyə mənfi təsir göstərən həll olunmamış məsələlərə ünvanlanıb: “Lakin bu müraciət Afrikadakı münaqişələrə , Dağlıq Qarabağ və Cənubi Çin dənizi ilə bağlı iddialara diqqət yetirmir”.
Teysin fikrincə, MTK rəhbərliyi Dağlıq Qarabağ münaqişəsinə dair məruzəçisi Azərbaycanın XİN rəhbəri Elmar Məmmədyarov olan xüsusi plenar sessiya təşkil etməli idi .
O əlavə edib ki, “XİN rəhbərləri debatı” və “İŞİD terroru və azadlıqların qorunması”na dair sessiyada Avropa gücləri üstünlük təşkil edirdi, lakin bura silahlı münaqişə və beynəlxalq birlik tərəfindən tanınmış əraziləri işğalda olan dövlətlərin nümayəndələri cəlb edilməmişdi.
Ekspert əlavə edib ki, konfransda həmçinin “İqlim və Enerji Təhlükəsizliyi” nə dair panel müzakirələri keçirildi: “Bu sessiyada Azərbaycan Prezidenti haqlı olaraq panelistlərdən biri idi. Ötən illər ərzində Bakı Aİ üzvü olan bir çox dövlətləri təbii qaz və neftlə təmin edən etibarlı tərəfdaş olub. Digər tərəfdən Aİ və ABŞ Qarabağ münaqişəsinin həlli istiqamətində aktiv rol oynamayıb”.
Onun fikrincə, 52-ci Münhen Təhlükəsizlik Konfransı bir daha Azərbaycanın ərazi bütövlüyünün müdafiəsində səsini qaldıra bilmədi.
Sonda ekspert onu da deyib ki, ABŞ Hökuməti rəhbərliyi ələ alaraqAzərbaycanın ərazi bütövlüyünün təmin edilməsində beynəlxalq ictimaiyyətlə işləməli, qaçqın və məcburi köçkün öz yurdlarına təhlükəsiz qayıtmasına zəmanət verilməli və Minsk qrupu ləğv edilməlidir.
yk news tv
