QHT Şurasına seçkilər keçiriləcək
Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasına seçkilər keçiriləcək. Şura Katibliyidən yknews.az saytına verilən məlumata görə, Şura üzvlüyünə yeni namizədlərin irəli sürülməsini təmin etmək üçün 2016-cı ilin mart ayı ərzində aşağıda qeyd olunan sahələr üzrə ixtisaslaşmış QHT qruplarının yığıncaqları keçiriləcəkdir:
insan hüquqları və demokratiya;
ailə, qadın və uşaq məsələləri;
qaçqın, köçkün, əlil və veteranların məsələləri;
iqtisadi və sosial məsələlər;
təhsil, elm və mədəniyyət;
gənclər və vətənpərvərlik tərbiyəsi;
səhiyyə, sağlamlıq və ekologiya;
narkomaniyaya, korrupsiyaya, insan alverinə və terrorizmə qarşı mübarizə.
Yığıncaqlarda iştirak etmək və namizədləri irəli sürmək üçün qeyri-hökumət təşkilatları 2016-cı il fevralın 29-nadək Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının Katibliyinə ərizə ilə müraciət edə bilərlər. Hər bir QHT yalnız bir ixtisaslaşmış qrup üzrə qeydiyyata alınır və yığıncaqda bir nümayəndə ilə təmsil olunur. Ərizədə QHT iştirak edəcəyi qrupu göstərməli və öz nümayəndəsi haqqında məlumat verməlidir (ərizənin forması əlavə olunur-Əlavə 1).
QHT Şura üzvlüyünə namizəd irəli sürə bilər. İrəli sürülən namizəd “Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası haqqında Əsasnamə”nin 3.3. və 3.4-cü bəndlərinin tələblərinə uyğun olmalıdır. Namizədi irəli sürmüş qeyri-hökumət təşkilatı müvafiq ərizəni və anket məlumatlarını Katibliyə təqdim etməlidir (namizədlik üçün ərizə forması-Əlavə 2 və anket məlumatlarının forması-Əlavə 3).
QHT qrupları üzrə yığıncaqların keçirilmə tarixi və yeri haqqında əlavə məlumat veriləcəkdir. Ərizə və anket formalarını Şuranın www.cssn.gov.az və www.qhtxeber.az saytlarından əldə etmək olar. Nümayəndələrin və namizədlərin siyahısı seçkilərin keçirilməsindən 5 gün əvvəl qeyd olunan saytlarda yerləşdiriləcəkdir.
yk news tv
