Kaladze gözlənilmədən Azərbaycana gəldi
Gürcüstan baş nazirinin birinci müavini, energetika naziri Kaxa Kaladze Azərbaycana işgüzar səfərə gəlib.
ANS PRESS-in Gürcüstanın Energetika Nazirliyinə istinadən verdiyi məlumata əsasən Kaladze səfər çərçivəsində Azərbaycan Dövlət Neft Şirkətinin prezidenti Rövnəq Abdullayevlə görüşəcək.
Görüşdə həmçinin cari məsələlər və gələcək əməkdaşlığın perspektivləri müzakirə olunacaq.
Bundan əvvəl Kaxa Kaladze və Rövnəq Abdullayevin görüşü SOCAR rəhbərinin Gürcüstana səfəri çərçivəsində baş tutub.
Görüşdən sonra mətbuata açıqlama verən Gürcüstanın Energetika naziri Kaxa Kaladze bildirib ki, bu il Azərbaycan ixrac etdiyi təbii qazın həcmini artıra bilmir.
"SOCAR bu il Gürcüstanın qaza olan tələbatını ödəyə bilməyəcək. Hazırda yeni tarif planı üzrə danışıqlar aparılır. " -deyə Kaladze əlavə edib.
Rövnəq Abdullayev-SOCAR rəhbəri
Gücüstanın qaz bazarında ən böyük pay SOCAR-a məxsusdur. Əgər Rusiya və ya İranGürcüstanın qaz bazarına daxil olarsa, SOCAR-ın payı azala bilər. Bu isə Azərbaycanın iqtisadi hədəflərinə uyğun gəlmir.
Gürcüstan hazırda özünü üç mənbədən qazla təmin edir. Rəsmi Tiflis gün ərzində SOCAR –dan 6 milyon, "Şahdəniz 1"dən təxminən 3 milyon kubmetr qaz alır. "Şahdəniz 1"dən Bakı-Tiflis-Ərzurum boru kəməri ilə nəql edilir.
Bakı-Tiflis-Ərzurum boru kəməri (qırmızı xətlə işarələnib)
Gürcüstan Rusiyadan isə 2-2,5 milyon kubmetr qaz idxal edir. “Qazprom” Gürcüstana 2014-cü ildə 300 milyon kubmetr qaz satıb. Rusiya Ermənistana ötürdüyü qazının tranzit haqqının əvəzində Gürcüstana “mavi yanacaq”satır.
Gürcüstan hazırda İran və Rusiyadan qaz idxal etmək istəyir. Hökumətin ötən il İran və Rusiya ilə ilk gizli qaz danışıqları üzə çıxmışdı. Amma həmin vaxt heç bir tərəflə razılaşma əldə olunmamışdı.
Gürcü xalqı və müxalif siyasi partiyalarda Rusiyadan qaz ixracına etiraz edirlər. Onlar qaz ixracından Rusiyanın nə vaxtsa öz siyasi məqsədləri üçün istifadə edə biləcəyini düşünürlər.
yk news tv
