Kamal Abdulla: “Bizim hətta erməni olan Azərbaycan vətəndaşları var”
Azərbaycanda erməni fobiyasının olmamasını artıq dünya başa düşməkdədir.
Trend-in məlumatına görə, bunu Azərbaycan Prezidentinin millətlərarası, multikulturalizm və dini məsələlər üzrə dövlət müşaviri Kamal Abdulla bu gün keçirdiyi mətbuat konfransında deyib.
K.Abdulla qeyd edib ki, erməni fobiyasının olmamasını konkret əməllərlə dünyaya göstərmək lazımdır: "Xalq diplomatiyası çərçivəsində Bakıya gələn ermənilər erməni kilsəsində erməni dilində kitabların, materialların səliqə-səhmanla qorunub saxlanıldığını görəndə təəccüblənmişdilər. Erməni fobiyasının olmamasını biz hər addımımızda dünyaya bəyan etməklə deyil, konkret işimizlə göstərməliyik. Bizim hətta erməni olan Azərbaycan vətəndaşları var".
Dövlət müşaviri qeyd edib ki, Azərbaycan xalqının ermənilərlə birgə yaşamaq potensialı var: "Münaqişənin sülh yolu ilə həll olunması məsələsi bitməyib. Biz münaqişəni sülh yolu ilə həll etmək istəyirik. Azərbaycan cəmiyyətində ermənilərlə bir yerdə yaşamaq potensialı var".
K.Abdulla qeyd edib ki, hazırda multikulturalizm ənənələrinin yayılması istiqamətində aparılan işlərdən biri də Azərbaycanda 1993-94-cü il hadisələrinin təkrarlanmasına imkan verməməkdir: "Tolerantlıq ənənələrinin dərinləşməsi insanların bir-birinə olan münasibətlərinə təsir göstərir. Eyni dinə aid olan insanlar arasında xoş münasibətlər yaranmalıdır. Multikulturalizm hədəfləri də yalnız müxtəlifliklər arasında deyil, eyniliklər arasında da xoş münasibətlərin yaranmasına imkan verməkdir. Multikulturalizm ideyaları həm də azərbaycançılıq ideyalarını təbliğ edən bir çətirdir".
K.Abdulla deyib ki, Balı Beynəlxalq Multikulturalizm Mərkəzi ölkə daxili ilə yanaşı, xaricdə də fəaliyyətə başlayacaq.
Onun sözlərinə görə, Almaniyanın Drezden şəhərində Bakı Beynəlxalq Multikulturalizm Mərkəzinin filialı fəaliyyətə başlayıb: “Biz bu siyasəti davam etdirəcəyik. Bu il çərçivəsində Azərbaycanın rayonlarında, Rusiyada, Portuqaliyada və başqa ölkələrdə mərkəzlər yaradılacaq".
K.Abdulla qeyd edib ki, dünya universitetlərində multikulturalizm fənninin tədrisi də davam edəcək.
yk news tv
