Fuad Muradov: “Bizim əsas işimiz insanları narahat edən məsələləri həll etməkdir”
Dünən Milli Məclisin deputatı Fuad Muradov 34 saylı Xətai ikinci seçki dairəsi ərazisində yaşayan 60-a yaxın sakinlə görüşüb.
Sakinlər istirahət günü olmasına baxmayaraq onların dəvətini qəbul edib görüşə gəldiyi üçün millət vəkilinə öz təşəkkürlərini bildiriblər. Fuad Muradov görüşdə seçiciləri ilə birbaşa ünsiyyətdə olması və onları narahat edən məsələləri yerindəcə öyrənməsi əsas fəaliyyət istiqamətlərindən biri olduğunu qeyd edib.
“Bu görüşlərimiz mütamadi olur. Bu gün General Şixlinski küçəsinin sakinlərinin müraciəti daha çox olduğu üçün burda görüşürük. Amma mən bilirəm ki, rayonun digər küçələrinin sakinləri də var. Bu gün ölkəmizdə cənab Prezidentin qarşıya qoyduğu əsas məsələ hər bir vətəndaşın müraciətinin cavabsız qalmamasıdır. Bizim də işimiz odur ki, insanları narahat edən məsələləri öyrənək və həllinə çalışaq.”
Sakinlər bildirdilər ki, bu gün dünyada gedən proseslərin Azərbaycana təsiri qaçılmaz olduğu kimi onların da gündəlik həyatlarından yan keçməyib. Lakin bu istiqamətdə aparılan islahatların təqdirəlayiq olduğu diqqətə çatdırılıb. Çörəyin qiymətinin əvvəlki həddə qaytarılması və təqaüdlərin artırılması bu islahatların getdiyindən xəbər verir. Biz inanırıq ki, cənəb Prezident bundan sonra da insanları rifahı üçün mühüm tədbirlər həyata keçirəcək.
Görüşdə sakinlər onları narahat edən məsələləri millət vəkilinin diqqətinə çatdırıblar. Qeyd olunub ki, rayonun bir sıra məhəllələrində istilik problemi, küçələrin işıqlandırılması, məhəllədaxili yolların təmiri, bəzi binalarda lift problemi mövcuddur. Millət vəkili qeyd edilən bütün məsələləri diqqətdə saxlayacağını və sakinlərin müraciətləri əsasında aidiyyatı qurumlarla birlikdə həllinə çalışacağını bildirib.
Sakinlər hazırkı vəziyyətdən sui-istifadə edənlərə qarşı sərt tədbirlərin görülməsinin vacibliyini qeyd ediblər. Bildirilib ki, Azərbaycan üçün əsas məsələ ölkəmizin ərazi bütövlüyü olmalıdır. Xalqımız bu çətin dönəmdən də uğurla çıxıcaq və ölkəmizin müstəqilliyini qoruyacaqdır.
yk news tv
